Ashat Aımaǵambetov: Jazǵy mektep – oqýshylar úshin májbúrli bolmaýy tıis
NUR-SULTAN. QazAqparat – Bilim jáne ǵylym mınıstri Ashat Aımaǵambetov jazǵy mektep júıesi oqýshylarǵa májbúrli bolmaýy kerektigin eskertti, dep habarlaıdy QazAqparat tilshisi.
«Qazir oqý jyly aıaqtaldy. Jańa oqý jyly bastalar aldynda mınıstrlik bergen tapsyrmalarǵa sáıkes jumysty formaldy túrde emes, jaqsylap, naqtylap uıymdastyrý kerek. Biz sizdermen keliskendeı, 17 tamyzdan bastap mektepterde jazǵy mektep formatynda eki aptalyq daıyndyq sharasy ótkiziledi. Bilýimshe óńirler bul jumysty uıymdastyrýdy bastapty. Balalarǵa bul rette óz erkimen qatysý múmkindigin berýimiz kerek. Májbúrlep, jazǵy mektepke qatysý kerek degen talap qoıylmaýy tıis», - dedi Ashat Aımaǵambetov Bilim jáne ǵylym mınıstrliginiń apparattyq otyrysynda.
Mınıstrdiń aıtýynsha matematıka, qazaq tili, orys tili pánderi boıynsha balalar oqý jyly qarsańynda mektepke baryp, daıyndalǵysy kelse – sol jumys uıymdastyrylatynyn málim etti.
«Taǵy da aıtaıyn: májbúrlep, formaldy túrde ol jumys júrgizýge bolmaıdy. Bul ýaqytta muǵalimder eńbek demalysynan shyǵady. Sondyqtan eshqandaı kedergi bolmaıdy dep oılaımyn», - dedi ol.
Eske sala ketsek buǵan deıin Ashat Aımaǵambetov muǵalimder jazda demalýy kerektigin aıtqan bolatyn.
