Ashat Aımaǵambetov jańa oqý jyly týrasynda: Tıisti qujattardy daıyndadyq

NUR-SULTAN. QazAqparat – Bilim jáne ǵylym mınıstri Ashat Aımaǵambetov jańa oqý jylynda qashyqtan bilim berý júıesine muǵalimderdiń daıyndyǵy týraly aıtty, dep habarlaıdy QazAqparat tilshisi.

«Oqý jylyn bastaý úshin qajetti normatıvtik - metodologııalyq qujattardy qabyldaý mańyzdy. Tıisti qujattardyń barlyǵyn daıyndadyq. Qashyqtan oqytý tehnologııalaryn qoldaný jáne oqytý formattary boıynsha egjeı-tegjeıli ári qadamdyq nusqaýlyqtar ázirlendi. Densaýlyq saqtaý mınıstrligimen birlesip, bilim berý uıymdarynyń qyzmetin júrgizýdiń sanıtarlyq talaptary da ázirlendi», - dedi mınıstr Úkimet otyrysynda.

Onyń sózine qaraǵanda, qashyqtan oqytý kezinde oqý protsesiniń prıntsıpteri men tehnologııalary sáıkesinshe ózgeredi. Osyǵan baılanysty tórtinshi toqsan tájirıbesin eskerip, baǵalaý normalaryn, oqytý ádistemesin ózgertý jáne keri baılanysty júzege asyrý boıynsha da birqatar jumys júrgizildi. Shilde aıynan bastap oblystyq bilim basqarmalarymen, aýdandyq, qalalyq bólimdermen jáne ádistemelik kabınettermen qashyqtan oqytý júıesiniń negizgi baǵyttaryn túsindirý, sanıtarlyq-epıdemıologııalyq jaǵdaıǵa baılanysty ártúrli formatqa kóshý boıynsha kúndelikti vebınarlar ótkizilip keledi.

Jeke keste boıynsha barlyq 7 myńnan asa qazaqstandyq mektep dırektoryna, olardyń 12 myńdaı orynbasaryna jáne 2 myńǵa jýyq ádiskerge qashyqtan oqytýdy uıymdastyrý boıynsha túsindirý semınarlary ótkizildi. Bul jumys áli jalǵasady.

«Elimizdiń barlyq muǵalimderi úshin jeke grafıkpen biliktilikti arttyrý kýrstaryn bastadyq. Oǵan 100 paıyz muǵalim qamtylatyn bolady», - dedi A. Aımaǵambetov.

Budan buryn habarlanǵandaı, mınıstr bastaýysh synyp oqýshylary úshin kezekshi synyptar ashylatynyn aıtty.

Sonymen qatar, jańa oqý jylynda kolledj stýdentteriniń bilim alý tártibin túsindirdi.