Ashat Aımaǵambetov: Jańa Konstıtýtsııa muǵalim aılyǵynyń azaımaıtynyna kepil bolady

ASTANA. KAZINFORM – Májilis depýtaty Ashat Aımaǵambetov jańa Konstıtýtsııanyń ǵylym men bilimge basymdyq beretin normalary qarapaıym qazaqstandyqtardyń ómirine qalaı áser etetinin aıtty. 

– Birinshi kezekte qazirgi Konstıtýtsııadaǵy azamattardyń mektepte aqysyz bilim alý, konkýrstyq negizde aqysyz joǵary bilim alý quqyqtary jańa Konstıtýtsııada da saqtalady. Memlekettiń bul turǵydaǵy mindettemeleri qysqarmaıdy. Preambýlada alǵash ret ǵylym-bilim, ınnovatsııa týraly aıtylǵan. Memleket damýynyń basym baǵyttarynyń, basty qaǵıdattarynyń ishinde bilim men ǵylym, ınnovatsııa tur, - dedi ol «Referendým-2026» atty onlaın-marafonda.

Depýtattyń paıymdaýynsha, jańa Konstıtýtsııada bilim men ǵylym salasyn qarjylandyrý saıasaty aıqyndala túsken. 

– Mysaly, Qarjy mınıstrligi, basqa da ýákiletti organdar ǵylym salasyna, bilim salasyna bólinetin qarjyny qysqartaıyq dep, muǵalimderdiń aılyǵyn azaıtaıyq dep endi aıta almaıdy. Óıtkeni ol tek zańǵa nemese áldebir baǵdarlamalarǵa qarsy shyǵyp qana qoımaıdy, Konstıtýtsııaǵa qarsy shyqqan bolyp shyǵady. Óıtkeni bul máseleler Konstıtýtsııanyń birneshe jerinde memlekettiń basym baǵyty retinde bekitilip otyr. Sondyqtan bul qarapaıym azamattardyń balasyn balabaqshaǵa berý, mektepte oqytý quqyqtaryna kepildik beredi. Joǵary bilim alatyn, ǵylymmen aınalysatyn azamattarǵa da bul úlken kepildik, - dedi Ashat Aımaǵambetov. 

Aıta keteıik, Kazinform agenttiginiń YouTube arnasynda «Referendým-2026» atty onlaın-marafonyn tikeleı efırde kórsetip jatyr. Saǵat 12:00-de bastalǵan onlaın-marafon saǵat 18:00-ge deıin jalǵasady dep josparlanǵan.