Ashat Aımaǵambetov ulyna mektep formasyn qansha teńgege aldy

NUR-SULTAN. QazAqparat – QR Oqý-aǵartý mınıstri Ashat Aımaǵambetov ulynyń mektep formasyn qaıdan jáne qansha teńgege alǵanyn aıtty, dep habarlaıdy QazAqparat tilshisi.

Mınıstrdiń aıtýynsha, ázirge mektep jasyndaǵy bir balasy bar.

«Osy demalysta balamdy ertip dúkenge bardym. Birneshe aq jeıde, shalbar, kostıým, galstýk aldyq. Baǵasyna kelsek, 35 myńǵa jýyq aqsha ketti. Qaıdan deseńizder, «Glasman» atty dúkenge baryp, jurtpen birge kezekke turyp, 36-ólshemdi kıim alyp qaıttyq. Barlyq otbasylar sekildi biz de mektepke daıyndyqty bastadyq», - dep jaýap berdi mınıstr Úkimet kýlýarynda tilshilerdiń suraǵyna.

Sonymen birge, mınıstr áleýmettik jaǵdaıy tómen otbasylarǵa mektep jaraǵyn alýǵa kómek kórsetiletinin eske saldy.

«Bıyl óte mańyzdy eki sheshim qabyldadyq. Bul máseleni ata-analar úsh jyl boıy kótergen edi. Birinshiden, oqýshylarǵa shaq emes, jeńi salbyrap turatyn mektep formalary taratylatyn. Bul máseleni sheshý úshin formaǵa qajetti qarajatty ata-ananyń jeke shotyna aýdarýdy uıǵardyq. Bul jumystar júrgizilip jatyr. Ekinshiden, mysaly Soltústik Qazaqstanda byltyr bir oqýshyǵa 17 myń teńge ǵana bólinetin. Keı óńirlerde 20 myń, keı óńirlerde 25 myń teńge berilip kelgen. Endi bıyl qarajattyń eń tómengi deńgeıin 37 myńǵa deıin kóterdik. Keı óńirlerde, mysaly Almaty qalasynda 43 myń teńgege deıin kóbeıtildi. Biz muny qoldaımyz. Bul sheshimder 475 myń balanyń máselesin sheshýge kómektestedi», - dedi Ashat Aımaǵambetov.