Ashat Aımaǵambetov UBT tapsyrý kezinde qoldanylatyn jańa tetikti atady

NUR-SULTAN. QazAqparat – Bıyl Ulttyq biryńǵaı test kezinde talapkerdiń synaq tapsyrý barysyn 2 kamera qadaǵalaıtyn bolady. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Bul - bizde jyl saıyn dástúrli formatta ótkiziletin testileý. Bıyl ony aqpan aıynyń sońyna deıin jalǵastyramyz. Ótinish bildirgen barlyq azamat osy testini tapsyryp úlgerýi kerek. Bul mindetti grantty alýǵa baǵyttalǵan test emes. Muny keıbir azamattarymyz daıyndyq retinde qaraıdy. Basqalary joǵary oqý oryndaryna aqyly túrde túsý úshin tańdaıdy, oǵan sertıfıkaty jaramdy. Qalaı desek te, bul testileý túlekterimiz úshin mańyzdy. Sondyqtan osy jumysty tıisti deńgeıde júrgizýimiz kerek», - dedi Ashat Aımaǵambetov mınıstrliktiń apparat jınalysynda.

Sonymen qatar ol bıyl Ulttyq biryńǵaı testileý barysynda qoldanylatyn jańa tetik jaıynda aıtty.

«Ulttyq biryńǵaı testileýdi bıyl da elektrondy formatta ótkizýimiz qajet. Ashyqtyqty, ádildikti qamtamasyz etý - basty mindettiń biri. Bıyl jańa tetikter de engiziledi. Onyń ishinde qosymsha kamera bolady. ıAǵnı, endi bir kamera emes, 2 kamera bir test tapsyrýshyǵa arnalyp qoıylady. Bir kamera talapkerdiń test tapsyrý barysyn qadaǵalasa, ekinshi kamera sol adamnyń ózi otyrǵan-otyrmaǵanyn belgilengen ýaqyttyń ishinde sýretke túsirip, tirkeıdi. Testileýdiń basynan aıaǵyna deıin basqa adam emes testi tapsyrýshynyń ózi otyrǵanyn baqylaıdy. Fist Id fýnktsııasy bar arnaýly kamera bolady. Sondyqtan osy josparlardy tıisti deńgeıde oryndaý qajet», - dedi mınıstr.