Ashat Aımaǵambetov Túrkistandaǵy departament basshysyna eskertý jasady
NUR-SULTAN. QazAqparat – Sońǵy bir aı ishinde QR Bilim jáne ǵylym mınıstrligine Túrkistan oblysyndaǵy muǵalimder tarapynan 17 aryz-shaǵym kelip túsken, dep habarlaıdy QazAqparat mınıstrliktiń baspasóz qyzmetine silteme jasap.
Bul týraly Bilim jáne ǵylym vıtse-mınıstri Sholpan Karınova mınıstrliktiń apparattyq keńesinde Túrkistan oblysy boıynsha bilim salasyndaǵy baqylaý departamenti basshysynyń esebin tyńdaý barysynda aıtty.
Vıtse-mınıstrdiń sózinshe, aryzdardyń basym bóligi orynsyz jumystan shyǵarý, aqsha jınaý jáne mektep dırektorlaryn taǵaıyndaýda jiberilgen qatelikterge baılanysty máselelerge qatysty bolǵan. Odan bólek, óńirde túrli baıqaýlar men olımpıadalarda júldeli oryndardy negizsiz ıelený faktileri kezdesken.
Apparattyq keńes barysynda Bilim jáne ǵylym mınıstri Ashat Aımaǵambetov Túrkistan oblysy boıynsha bilim salasyndaǵy baqylaý departamentiniń basshysy Baqytjan Muhamedjanovqa eskertý jarııalady.
«Nege tıisti sharalar qoldanylmaǵan? Eger bul shaǵymdar sizderge túspese, demek, shaǵymdanýshylar tarapynan sizderge senim joq degendi bildire me? Belsendirek jumys jasaý kerek. Nátıjesin kórmedik. Eki aıdan soń baıandamańyzdy tyńdaımyz. Qatań eskertemin» – dedi Ashat Aımaǵambetov.
