Ashat Aımaǵambetov til bilý daǵdylaryn ólsheıtin reıtıngter týraly aıtty

NUR-SULTAN. QazAqparat – Bilim jáne ǵylym mınıstri Ashat Aımaǵambetov halyqtyń tildik daǵdylaryn ólsheıtin halyqaralyq reıtıngter týraly telegram kanalynda jazdy, dep habarlaıdy QazAqparat.

«Jaqynda men halyqtyń tildik daǵdylaryn ólsheıtin halyqaralyq reıtıngter týraly jazyp edim. Bul jazbanyń mán-maǵynasy Qazaqstannyń ornyn kórsetý nemese mindetti túrde eldiń jetistikterine nazar aýdarý emes edi. Degenmen osy jazbanyń astyndaǵy pikirler oqyrmannyń kópshiligi basqasha túsingenin, kóbinese Qazaqstannyń IELTS nátıjeleri týraly aqparatty ǵana oqyǵanyn kórsetti. Biraq men halyqtyń tildik daǵdylaryn baǵalaıtyn birneshe reıtıngtiń dıametraldi qarama-qarsy nátıjelerin arnaıy kórsetýge tyrystym. Maqsat osy reıtıngterdiń ádistemesin túsindirý boldy. Olardyń qandaı krıterııler negizinde qalyptasatynyn, árbirinde avtorlyq ádisteme bar ekenin jáne keıde olardyń ataýlaryn nemese qorytyndylaryn oqyǵanda bul reıtıngterdiń bizdiń túsingenimizden áldeqaıda basqasha bolatynyn kórsetý mańyzdy boldy. Sol sebepti ádistemeni túsiný jáne kórý mańyzdy ekenin taǵy da eske salǵym keledi», - dedi Bilim mınıstri.

Sonymen qatar Ashat Aımaǵambetov bilim salasyndaǵy ártúrli reıtıngter jáne zertteýler jaıynda aqparattarmen bólisýdi jalǵastyratynyn jáne reıtıng qanshalyqty reprezentatıvti jáne naqty ekenin ár oqyrman ózi sheshýi tıis ekenin jetkizdi.