Ashat Aımaǵambetov: TALIS-2024 jetistigi – Pedagog mártebesi týraly zańnyń jemisi

ASTANA. KAZINFORM – Májilis depýtaty Ashat Aımaǵambetov Ekonomıkalyq yntymaqtastyq jáne damý uıymy júrgizgen TALIS-2024 halyqaralyq zertteýiniń nátıjesi týraly jazba jarııalady.

Aıta ketý kerek, Úkimettiń baspasóz qyzmeti Qazaqstannan 7 myńnan astam pedagog jáne 369 mektep dırektory qatysqan TALIS-2024 halyqaralyq zertteýiniń elge qatysty nátıjelerin jarııalaǵan. Munda qazaqstandyq muǵalimderdiń júktemesi 2018 jylmen salystyrǵanda aptasyna 14 saǵatqa qysqarǵany aıtylǵan. Úkimet bul kórsetkishti bilim berý salasyndaǵy ilgerileý retinde baǵalap otyr.

Májilis depýtaty, burynǵy Bilim jáne ǵylym mınıstri Ashat Aımaǵambetov te osy aqparatqa baılanysty jazba jarııalady.

Ol óz jazbasynda elimizde Pedagog mártebesi týraly zań qabyldanǵan kezde sala basshysy bolǵanyn eske salady.

- Sol kezde biz aıtqanbyz: bul zańnyń áseri birden baıqalmaıdy, oǵan ýaqyt qajet. Endi mine, sol ýaqyt keldi- zań óz tıimdiligin dáleldedi. Aldaǵy jyldary bul áser odan da aıqyn bolady dep senemin, - dep jazdy Ashat Aımaǵambetov.

Onyń aıtýynsha, «TALIS 2024» zertteýi 2018 jylmen salystyrǵanda mynandaı mańyzdy kórsetkishterdi anyqtaǵan:

- Muǵalimderdiń júktemesi aptasyna 14 saǵatqa qysqaryp, orta eseppen 36 saǵat bolǵan;

- 71% muǵalim jumys jaǵdaıyna qanaǵattanatynyn aıtqan;

- Jalaqysyna qanaǵattanǵan pedagogterdiń úlesi 39%-dan 71%-ǵa jetken.

- 82% pedagog óz eńbegi qoǵamda baǵalanady dep sanaıdy;

- 58% - y saıasatkerler arasynda da muǵalimderge degen qurmet artqanyn atap ótti.

- jas mamandardyń 78%-y pedagogıkalyq qyzmetti sanaly túrde ómirlik basymdyq dep ataǵan.

- Bir kezde biz «Pedagog mártebesi týraly» zańdy ázirlegende TALIS 2018 derekterine de súıengen edik. Endi TALIS 2024 baǵytymyz durys bolǵanyn kórsetip otyr, - dep jazdy depýtat.