Ashat Aımaǵambetov SQO oqý oryndarynda qandaı ózgerister bolatynyn aıtty
«Tehnıkalyq jáne kásiptik bilim berý boıynsha «Jas maman» jobasy aıasynda 2021 jyly 9 kolledjdi jabdyqtaımyz. 2025 jylǵa deıin jastardy kezeń-kezeńmen 100%-ǵa deıin kolledjderde aqysyz oqýmen qamtý josparlandy. Ol úshin qosymsha granttar beriledi», - dedi mınıstr.
Joǵary bilim salasyna toqtalǵan mınıstr, Memleket basshysynyń tapsyrmasyna sáıkes
M. Qozybaev ýnıversıtetinde Akademııalyq artyqshylyq ortalyǵy quralatynyn aıtty.
«Qarajat ınnovatsııalyq zerthanalardy qurýǵa, bilim berý baǵdarlamalaryn jańartýǵa, halyqaralyq ǵylymı jobalarǵa qatysýdy qarjylandyrýǵa jáne basqa da baǵyttarǵa beriledi. Osy baǵytta bıýdjetten 5 mlrd teńge bóliný josparlanýda. Sonymen birge ýnıversıtette respýblıkalyq bıýdjet esebinen 600 oryndyq eki jataqhanana salý úshin 4,3 mlrd teńge qarastyrylyp otyr. Buǵan qosa, qoldanystaǵy úsh jataqhanada 2,2 mlrd teńgege jáne bes oqý ǵımaratynda 2,4 mlrd teńgege kúrdeli jóndeý júrgiziledi. Osyndaı josparymyz bar. Sonymen osy ýnıversıtet tolyǵymen modernızaııadan ótedi dep aıta alamyz», - dedi A. Aımaǵambetov.
«Nazarbaev Ýnıversıtetiniń tájirıbesi boıynsha eki óńirlik joǵary oqý ornyn qurý josparynyń aıasynda Petropavl qalasynda osyndaı ýnıversıtet qurylatyn bolady. Bul ýnıversıtet álemniń úzdik ýnıversıtetterimen birge jańa bilim berý baǵdarlamalaryn iske asyryp, nátıjesinde biz óńirlik zertteý ortalyǵyna ıe bolamyz. Onda ozyq zertteý men ozyq bilim berý úshin jaǵdaılar jasalady», - dep naqtylady vedomstvo basshysy.
Mınıstrlik oblys aýmaǵynda jumysqa turǵan «Serpin» baǵdarlamasy túlekteriniń eńbekpen óteý merzimin 2 jylǵa deıin azaıtý boıynsha ózgerister engizýdi josparlap otyr.
Kórshi elderdiń joǵary oqý oryndarynan M. Qozybaev atyndaǵy ýnıversıtetine aýysatyn stýdentterge jyl saıyn arnaıy 200 bilim grantyn bólý máselesi qarastyrylyp otyr.
Sonymen birge M.Qozybaev atyndaǵy Soltústik Qazaqstan ýnıversıtetine stýdentterdiń kelýin yńtalandyrý úshin 2000 arnaıy grant bólinedi.
Aıta keteıik, búgin Úkimet otyrysynda QR Ulttyq ekonomıka mınıstri Áset Erǵalıev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi josparyn tanystyrdy.
Premer-Mınıstr Asqar Mamın keshendi jospary óńirdiń ınfraqurylymyn jaqsartatynyn atap ótti.
