Ashat Aımaǵambetov: Pedagogterdiń eńbegin normalaý júıesin engizemiz
NUR-SULTAN. QazAqparat - Qazaqstanda pedagogterdiń eńbegin normalaý júıesi engiziledi. Atalǵan qujatty búgin Úkimet otyrysynda QR Bilim jáne ǵylym mınıstri Ashat Aımaǵambetov tanystyrdy, dep habarlaıdy QazAqparat tilshisi.
«Biz jobada pedagogterdiń mártebesin birinshi orynǵa qoıyp otyrmyz. Memleket basshysynyń tapsyrmasyna saı 4 jyl ishinde 500 myń pedagogtiń ebekaqysyn 2 esege ulǵaıtý qarastyrylǵan. Muǵalimderdi qaıta daıarlaý, biliktilikti arttyrýdyń jańa júıesi engiziletin bolady. Munan bylaı balabaqsha, qosymsha bilim jáne kolledj pedagogteri, olardyń basshylary attestattaýdan ótip, jalaqysy artatyn bolady. Pedagogterdiń eńbegin normalaý júıesin engizemiz jáne 2021 jyldan bastap ýnıversıtetterdiń túlekteri retteletin mamandyqtar boıynsha sertıfıkattaýdan ótetin bolady», - dedi 2025 jylǵa deıin Qazaqstanda bilim men ǵylymdy damytýdyń memlekettik baǵdarlamasyn tanystyrǵan mınıstr.
Sonymen qatar onyń aıtýynsha, pedagogıkalyq bilimdi jańǵyrtý, bolashaq muǵalimderdiń pedagogıkalyq praktıkasyn ózgertý jáne ony ulǵaıtý, oqý baǵdarlamalaryn jalpy 100 paıyzǵa jańartý qarastyrylǵan. 3-6 jastaǵy balalardy balabaqshamen 100 paıyz qamtý josparlanǵan.
«Sapany arttyrý maqsatynda olardy lıtsenzııalaýdy kezeńdep qaıtarý jáne balalardy mektepke daıarlaýdy jaqsartý úshin jańa baǵdarlamalar engizý kózdelgen. Biz búgin kúnde kórip otyrmyz, jekemenshik balabaqshalarda ártúrli keleńsiz jaǵdaılar kóbeıip ketti. Sondyqtan kezeń-kezeńmen lıtsenzııalaý máselesin de qolǵa alǵan jón dep uıǵardyq. Óńirlerdiń jekemenshik balabaqshalarynyń usynysy boıynsha memlekettik tapsyrys quny 30 myń teńgege deıin jetkiziledi. Ol úshin respýblıkalyq bıýdjetten 400 mlrd teńgeden astam qarjy qarastyrylyp otyr», - dedi ol.
