Ashat Aımaǵambetov Pavlodar oblysynyń pedagogterimen kezdesti

PAVLODAR. QazAqparat – Memlekettik tapsyrystardyń qunyn arttyrý, tálimgerlik qyzmetke qarajat tóleý jáne ózge de máseleler QR Oqý-aǵartý mınıstri Ashat Aımaǵambetovtiń Pavlodar oblysynyń pedagogterimen kezdesýinde kóterildi, dep habarlaıdy QazAqparat.

Mınıstr óńirge sapary kezinde aýdandar men qalalardyń bilim bólimderi basshylarymen, qalalar men aýyl mektepteriniń jáne arnaıy uıymdardyń dırektorlarymen, balabaqsha meńgerýshilerimen kezdesti.

Kolledjder men ónerkásip kásiporyndarynyń basshylary dýaldy oqytýdy damytý, memlekettik tapsyrystardyń qunyn arttyrý, tálimgerlik qyzmetke qarajat tóleý, kásiporyndarǵa dýaldy oqytýǵa arnaıy kıim men shyǵyndalatyn materıaldarǵa qarajat bólý, kásibı standarttardy ázirleý, oqý baǵdarlamalaryn jańartýǵa qatysty suraqtar qoıǵan. Sondaı-aq tehnıkalyq jáne kásiptik bilim berýdi damytý jóninde pikir-usynystaryn aıtty.

«Al aýdannyń, qalanyń bilim bólimderi basshylary, qala jáne aýyl mektep dırektorlary, arnaıy uıymdar jáne balabaqsha meńgerýshilerimen kezdesýde PMPK-nyń (psıhologııalyq-medıtsınalyq-pedagogıkalyq komıssııa) damýy, mektepke deıingi jáne orta bilim berý, balabaqshalardy lıtsenzııalaýdyń mańyzdylyǵy, oqý jylyna daıyndyq, jazǵy mektep nátıjeleri jáne basqa da máselelerdi talqyladyq», - dep jazdy A.Aımaǵambetov Facebook-te.

Pavlodar oblysynda jumys saparymen júrgen mınıstr buǵan deıin óńir turǵyndarymen kezdesip, esep bergen bolatyn. Odan bólek, iri ónerkásip jáne shaǵyn, orta bıznes ókilderiniń qatysýymen kolledj qyzmeti máseleleri boıynsha dóńgelek ústel otyrysyna qatysty.