Ashat Aımaǵambetov pandemııa kezindegi qabyldanǵan sheshimderge ókinbeıtinin málimdedi
NUR-SULTAN. QazAqparat – Bilim jáne ǵylym mınıstri Ashat Aımaǵambetov pandemııa kezindegi qabyldanǵan sheshimderge ókinbeıtinin málimdedi, dep habarlaıdy QazAqparat tilshisi.
«Áý basta basym kópshiligi «tórtinshi toqsandy shilde-tamyz aılaryna aýystyraıyq» dese, keıbiri «odan da osymen oqý jylyn aıaqtaıyq» degen edi. Alaıda osyndaı pikirlerge qaramastan biz oqýdy qashyqtan jalǵastyrý týraly sheshim qabyldadyq», - dedi Ashat Aımaǵambetov Bilim jáne ǵylym mınıstrliginiń onlaın formattaǵy tilshilermen kezdesýinde.
Bilim jáne ǵylym mınıstri bul sheshimniń oń bolǵanyn jetkizdi.
«Bul sheshimge tıtteı de ókinbeımin. Tolyǵymen durys dep esepteımin. Sol kezdegi usynystarǵa qulaq asqanda qazirgi shilde aıynda jaǵdaıymyz qalaı bolar edi – elestete berińiz», - dedi Ashat Aımaǵambetov.
Eske sala ketsek Prezıdent Qasym-Jomart Toqaev Úkimettiń keńeıtilgen otyrysynda mektepterdiń aldaǵy jańa oqý jylyna daıyndyǵyn pysyqtaǵan bolatyn.
«Bul – ákimdikter men mınıstrliktiń jumysynyń nátıjesi. Ákimdikter jańa oqý jylyna dereý daıyndalyp, mektepter men jekelegen muqtaj otbasylardy qajetti tehnıkamen jabdyqtaýǵa tıis. 1 qyrkúıekte jańa oqý jyly bastalady. Mınıstrliktiń bul oqıǵaǵa daıyndyǵyna kúmánim bar. Balalar qalaı oqıdy – mektepte nemese qashyqtan? Muǵalimderdiń jańa oqý jylyna daıyndyǵy qandaı?», - dep suraq qoıdy Memleket basshysy.
