Ashat Aımaǵambetov otandyq vaktsınanyń qujattary qashan tapsyrylatynyn aıtty

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov koronavırýsqa qarsy otandyq vaktsınany shyǵarýǵa qatysty túsinik berdi, dep habarlaıdy QazAqparat tilshisi.

«Tıisti standarttar boıynsha jumystar atqarylyp jatyr. Bıologııalyq qaýipsizdik problemalary ǵylymı-zertteý ınstıtýty tarapynnan qamtylǵan vaktsınaǵa toqtalsaq, barlyq rásimder bekitilgen kestege sáıkes júrigizilip otyr. Bul rette eshqandaı problema joq. Bizdiń áriptester 50 myń doza boıynsha qajetti jumystar júrgizdi. Hattama boıynsha únemi hımııalyq taldaý men bıologııalyq qadaǵalaý júrgiziledi. Qazir bıologııalyq qadaǵalaýdy aıaqtap jatyr. Kestege sáıkes, bıylǵy sáýir aıynyń sońyna qaraı, 20-synan keıin qujattardy Densaýlyq saqtaý mınıstrligine tapsyramyz. Olar nátıjelerge taldaý jasaı otyryp, tıisti sheshim qabyldaıtyn bolady. Sondyqtan sál sabyrlyq tanytyp, bizdiń ǵalymdarǵa qoldaý jasaıyq», - dedi mınıstr Ortalyq kommýnıkatsııalar qyzmetinde.

Osy oraıda A. Aımaǵambetov qazirgi ýaqytta ǵalymdar táýlik boıy jumys istep jatqanyn atap ótti. Ǵalymdarymyz bes platforma boıynsha vaktsına daıyndap jatyr.

«Sonymen qatar, bizdiń ǵalymdar koronavırýstyń «brıtandyq», «ońtústikafrıkalyq» shtamdary boıynsha zertteý júrigizip jatyr», - dedi mınıstr.

Budan buryn habarlanǵandaı, Ashat Aımaǵambetov vaktsınaǵa qatysty muǵalimderge úndeý jasady.