Ashat Aımaǵambetov otandyq ǵalymdardy kásibı merekelerimen quttyqtady
«Búgin – Qazaqstandaǵy ǵylym qyzmetkerleriniń kúni. Kúntizbedegi bul data kezdeısoq tańdalmaǵany belgili. 12 sáýir – Ǵylym akademııasynyń tuńǵysh Prezıdenti, kórnekti ǵalym-geolog Qanysh Sátbaevtyń dúnıege kelgen kúni. Qazaqtan shyqqan tuńǵysh akademıktiń ǵylym salasynda jolyn qýǵan izbasarlary az emes. Biz ǵylymnyń damýyna zor úles qosyp kele jatqan ǵalymdarymyzdy maqtan tutamyz», - dep jazdy mınıstr Facebook paraqshasynda.
Onyń atap ótýinshe, elimizdegi ǵylym salasynyń áleýeti zor. Máselen, Bıologııalyq qaýipsizdik problemalary ǵylymı-zertteý ınstıtýty ǵalymdarynyń koronavırýsqa qarsy ázirlegen vaktsınasyn erekshe atap ótýge bolady.
«Búgingi tańda ǵylym salasynyń jetistikteri aıtarlyqtaı kóp, degenmen problemalar da joq emes. Sondyqtan biz óz tarapymyzdan elimizdegi ǵylymnyń odan ári damýy úshin keshendi sharalar qabyldap jatyrmyz. Ǵylymdy respýblıkalyq bıýdjetten qarjylandyrý kólemi sońǵy eki jylda shamamen eki esege artty. 2025 jylǵa qaraı ǵylymdy qarjylandyrý kólemin jalpy ishki ónimniń 1 paıyzyna deıin ulǵaıtý josparlanǵan. Bul – otandyq ǵylymnyń damýyna úlken serpin bereri sózsiz», - dedi Ashat Aımaǵambetov.
