Ashat Aımaǵambetov meshitte qıylǵan neke týraly: Bul – zańsyz

ASTANA. KAZINFORM – Májilis depýtaty Ashat Aımaǵambetov resmı tirkeýsiz meshitte neke qııýdy zańsyz áreket dep esepteıtinin málim etti.

Jýrnalıster depýtattan meshitte resmı tirkeýsiz qıylǵan nekeni zańdy dep taný qanshalyqty oıǵa qonymdy ekenin surady.

«Siz aıtyp turǵan áreketterdi quptamaımyn, tipti zańsyz dep esepteımin. Bizde tıisti tártip boıynsha resmı tirkelgen neke ǵana zańdy bolyp esepteledi. Resmı tirkeýsiz qıylǵannyń bári neke bolyp eseptelmeıdi. Demek, meshitte nemese shirkeýde ǵana qıylǵan neke zańdy neke bola almaıdy», - dedi ol.

Depýtat zańda bul másele aıqyn rettelgenimen, meshitte ǵana neke qııa salý trendke aınalyp bara jatyr dep esepteıdi. 

«Shyn máninde bul zańǵa qaıshy. Biz – zaıyrly memleketpiz. Neke qııýdyń zańmen belgilengen tártibi bar. Resmı tirkeýsiz neke qııatyn dinı qyzmetkerlerdiń jaýapkershiligin talqylap, taldaý kerek. Men bul máselemen aınalysamyn», - dedi Ashat Aımaǵambetov.