Ashat Aımaǵambetov memlekettik apparatty qysqartý josparyna pikir bildirdi

NUR-SULTAN. QazAqparat – Bilim jáne ǵylym mınıstri Ashat Aımaǵambetov qysqartý sharalary bilim jáne ǵylym salasynyń qaı baǵyttaryn qamtymaýy kerektigin atady, dep habarlaıdy QazAqparat tilshisi.

Úkimet janyndaǵy kámeletke tolmaǵandardyń isteri jáne olardyń quqyqtaryn qorǵaý jónindegi vedomstvoaralyq komıssııanyń otyrysynda Ashat Aımaǵambetov óńirlerdiń ákimdikterinen bala qamqorlyǵymen aınalysatyn mamandardy qysqartpaýdy surady.

«Memlekettik apparatty qysqartý josparlanyp jatyr. Tapsyrma bolǵannan keıin qysqartý barlyq salany qamtıtyny túsinikti. Biraq balalar zardap shekpeýi kerek. Bul jóninde biz aıtqan bolatynbyz. Ásirese bul qamqorlyq organdarymen jumys isteıtin mamandarǵa qatysty. Qazirdiń ózinde ondaı mamandar tapshy. Onsyz da mindetterin tolyq atqarýǵa úlgermeı otyr. Patronattyq tárbıe, qamqorlyqqa alý, asyrap alý, balalardyń quqyǵyna baılanysty sot isteri de osynyń ishinde. Aýdandarda osy sharýanyń bári 1-2 eki adamnyń ǵana moınyna júktelgen. Kóbi sottarǵa qatysyp qana júr. Óıtkeni basqa jumystarǵa úlgermeıdi. Qamqorlyq jáne asyrap alý uıymdarynda qysqartý júretin bolsa, patronattyq tárbıedegi balalar qaraýsyz qalady. Óıtkeni baqylaý bolýy kerek. Osy máselege erekshe nazar aýdarýdy suraımyz», - dedi mınıstr vedomstvoaralyq keńes otyrysynda.