Ashat Aımaǵambetov: Mektepterge ınternet qosatyn provaıderdiń tarıfi óte qymbat
«Birinshiden aýqymdy jumys (bilim salasyn tsıfrlandyrýǵa qatysty) atqarylyp jatyr. Ony joqqa shyǵarýǵa bolmaıdy. Biraz aýyz toltyryp aıtatyn ózgeris bar. Biraq bizge búgingi kúni ol jetkiliksiz. Bizdiń basty mindetimiz – bilim salasyndaǵy tsıfrlandyrý saıasatyn belgileý, anyqtaý. Sol boıynsha tıisti normatıvtik-quqyqtyq aktilerdi qabyldaý. Bul bir. Ekinshiden tıisti talaptar qoıý. Úshinshiden barlyq deńgeı boıynsha tıisti jumysty uıymdastyrý. Osy rette birinshi másele boıynsha normatıvti quqyqtyq qujattar arqyly talaptar bekitý boıynsha jumys jetkiliksiz», - dedi Ashat Aımaǵambetov Bilim jáne ǵylym mınıstrliginiń apparattyq otyrysynda.
Mınıstrdiń aıtýynsha, mektepterge ınternet qyzmetin qosatyn provaıderdiń tarıfi óte qymbat.
«Ekinshiden, biz satyp alyp jatqan sol qyzmettiń sapasy tómen. 10 Mbıt degenimen, baryp ólshesek ol ólshemge jetpeıdi. Ony ár mekteptiń basshysy qadaǵalap, tıisti jumysty júrgizip, kerek bolsa shaǵymdanyp, sotqa berýi kerek. Biraq ol jumys, ókinishke qaraı, joq. Qomaqty qarajat bólinip jatqanymen, nátıjesi shamaly. Bizde birneshe provaıder – Qazaqtelekom, Bılaın, taǵy basqalary bar. Biz bir ǵana provaıdermen jumys júrgizbeı, qaısysy sapaly qyzmet kórsetedi – sonyń qyzmetin paıdalanýymyz kerek», - dedi ol.
Ashat Aımaǵambetov máselen 100 Mgıttik ınternet qyzmetin jeke tulǵalar - bir baǵamen, mektep - basqa baǵamen alatynyn aıtady.
«Mysaly Microsoft kompanııasy mektepterge kem degende 70 paıyz tómendetilgen tarıfpen qyzmet kórsetedi. Al basqa mekemelerge kommertsııalyq tarıfterdi usynady. Bizdiń memlekette de osyndaı saıasat bolýy kerek. Meniń oıymsha, ınternetke eń úlken tapsyrys berýshi – bilim salasy. Sondyqtan provaıderlermen jumys júrgizý kerek», - dedi mınıstr.
