Ashat Aımaǵambetov mektepterge ádebı kitaptardy kóptep satyp alýdy tapsyrdy
NUR-SULTAN. QazAqparat – Bilim jáne ǵylym mınıstri Ashat Aımaǵambetov mektepterge ádebı kitaptardy kóptep satyp alýdy júktedi, dep habarlaıdy QazAqparat tilshisi.
«Aldymen, mektepterdiń kitaphanalarymen jumys isteý – basty maqsattardyń biri bolýy kerek. Ekinshiden, ýnıversıtetterdiń kitaphanalary nazardan tys qalmaýy tıis. Ulttyq bilim berý derekter qorynyń (UBDQ) modýlin daıyndap berdik. Endi óńirlerdegi kitaphanalar osy qordy toltyrýy tıis. Bıyldan bastap kelgen oqýlyqtarda QR-kodtar bolady. Sol arqyly qolmen toltyryp jatpaı, biz aıtqan bazaǵa oqýlyqtarǵa qatysty aqparattyń bári engiziledi», - dedi Ashat Aımaǵambetov Bilim jáne ǵylym mınıstrliginiń apparat otyrysynda.
Mınıstr qor arqyly ár oqýlyqtyń kimge berilgenin, onyń bar-joǵyn anyqtap otyrýǵa bolatynyn aıtyp ótti.
«Osy arqyly «oqýlyq jetpeı qaldy» degen máseleden arylamyz. Sondyqtan tsıfrlandyrý máselesin daıyndap, aıaqtaýymyz kerek. Endigi jumys – uıymdastyrý. Jalpy kórkem ádebıet týraly da sóz qozǵaǵan edik. Ádebıet oqıtyn jas býyndy mektepten qalyptastyrýymyz kerek deımiz. Biraq, mektepterde shyny kerek, ádebı kitaptar jetkiliksiz kólemde satyp alynady. Sondyqtan kórkem ádebıetti tıisti tizim boıynsha satyp alýdy retteý kerek. Jergilikti bilim basqarmalarymen osy jumys uıymdastyrylsyn», - degen Ashat Aımaǵambetov bul máseleni uıymdastyrýdy orynbasary Sholpan Qarınovaǵa tapsyrdy.
