Ashat Aımaǵambetov mektepterde menedjment sapasyn arttyrý týraly pikir bildirdi
«Tıimdi menedjmenttiń nátıjesinde mektepte kásibı ujym men oqýǵa arnalǵan qolaıly orta qurylady. Sondyqtan osy máselege nazar aýdarý óte mańyzdy.
Bir aýdanda ornalasqan eki mektep, birdeı baǵdarlama boıynsha jumys isteıtin, bıýdjeti, múmkindikteri men ınfraqurylymy da birdeı kórshi turǵan qos bilim ordasy eki bólek nátıje kórsetetin jaǵdaılar kezdesedi.
Zertteý nátıjelerine súıensek, mundaı aıyrmashylyq kóbinese mektep basshysyna baılanysty. Óıtkeni tek myqty dırektor ǵana úzdik nátıjelerge qol jetkizetin uıymshyl ujym qalyptastyra alady», - dep jazdy mınıstr Facebook -tegi paraqshasynda.
Onyń aıtýynsha, mundaı dırektor jumysty tıimdi uıymdastyryp, ata-analar, oqýshylar jáne bilim berý qurylymdarymen ashyq jumys isteıdi. Sonymen birge qyzmetkerlerdi jigerlendirip, tek jetekshi bolyp emes, shyǵarmashylyq turǵyda shabyttandyrýshy ári kóshbasshy da bola biledi.
«Búgingi tańda biz kadr máselesine tap bolyp otyrmyz. Dırektor nemese oqý isiniń meńgerýshisine qoıylatyn talaptarǵa sáıkes keletin, atalǵan laýazymdarda jumys isteýge nıetti myqty qyzmetkerlerdiń qatary sırep barady, degen Ashat Aımaǵambetov onyń birneshe sebebin aıtyp berdi. «Muǵalimdermen salystyrǵanda dırektorlarǵa jaýapkershilik kóbirek júktelip, jalaqynyń tómen bolýyna baılanysty myqty pedagogter mektep dırektory bolǵysy kelmeı jatady.
Bul máselege áser etetin basqa da birqatar sebep bar. Sondyqtan orta bilim berý uıymdarynyń basshylary qoldaýdy qajet etetini sózsiz.
Memleket basshysy Qasym-Jomart Kemelulynyń tapsyrmasy boıynsha biz mektep basshylyǵy laýazymyna taǵaıyndaý tártibi, biliktilikti arttyrý júıesi, eńbekaqy tóleý jáne mektep dırektorlaryn attestattaý rásimin qaıta qarap jatyrmyz. Sondaı-aq rotatsııalaýdyń jańa ınstıtýty engizilip jatyr», - dedi ol.
Mınıstr birneshe jazbasynda osy suraqtarǵa toqtalyp, qabyldanyp jatqan sheshimderdiń sebepteri men mán-maǵynasyn ashyp aıtýǵa tyrysatynyn jetkizdi.
Sondaı-aq, Ashat Aımaǵambetov attestattaý boıynsha pikir bildirdi.
«Alǵash ret bilim berý uıymdarynyń basshylary men olardyń orynbasarlaryna attestattaý jáne biliktilik sanatyn berý júıesi engizilip jatyr. Attestattaý úsh jylda bir ret ótkizilip, eki kezeńnen turady.
Birinshi kezeńde zańnama boıynsha bilimin tekserýge arnalǵan jáne basqarýshylyq quzyretteri boıynsha test tapsyrady.
Ekinshi kezeńde bilim berý uıymdarynyń basshylary belgili bir ýaqyttaǵy atqarǵan jumysynyń tıimdiligi baǵalanady. Oqý meńgerýshileri úshin attestattaý testileýsiz tek bir kezeńnen turatynyn atap ótkim keledi», - dedi mınıstr.
Onyń aıtýynsha, attestattaý nátıjeleri boıynsha komıssııa atqaratyn laýazymyna sáıkestigi/sáıkes emestigi týraly jáne úsh sanattyń bireýin berý týraly sheshim qabyldaıdy. ıAǵnı, laýazymyna sáıkestigi belgili bolsa, dırektorǵa sanat beriledi. Kerisinshe, laýazymǵa sáıkes emes bolsa, dırektor jumystan bosatylýy múmkin.
Berilgen sanatqa baılanysty dırektor nemese oqý isiniń meńgerýshisi sanat úshin laýazymdyq jalaqydan 30%, 70%, 100% mólsherinde qosymsha aqy alatyn bolady.
Sonymen qatar mektep dırektory men onyń orynbasarlarynyń laýazymdyq jalaqysy jyl saıyn 25%-ǵa artady.
«Bul sharalardyń barlyǵy mektep basshylyǵynyń jalaqysyn muǵalimderdiń ortasha jalaqysynyń deńgeıine jaqyndatýǵa múmkindik beredi.
Degenmen, qabyldanyp jatqan bul sharalar mektep basshysy laýazymyna eń myqty mamandardy tartý úshin jetkiliksiz.
Basshylarǵa eńbekaqy tóleý júıesinde buryn-sońdy yntalandyrýshy faktorlar bolǵan joq. Kóshbasshynyń jalaqysy onyń tıimdi nemese tıimsiz bolýyna baılanyssyz birdeı bolatyn. Sonymen qatar mektepte 80 bala oqıtyn bilim ordasynyń dırektory men 1200 bala bilim alatyn mektep dırektory birdeı jalaqy alady.
Qazir biz attestattaýdy jáne jumys tıimdiligi úshin qosymsha aqy tóleý júıesin engizip jatyrmyz. Sondaı-aq mekteptiń jobalyq qýattylyǵyna baılanysty laýazymdyq jalaqyny dıfferentsııalaýdy engizý josparda bar.
Sondyqtan aldaǵy ýaqytta da biz mektepterdi eń myqty pedagogterdiń basqarýy úshin sharalar usynatyn bolamyz», - dedi Ashat Aımaǵambetov.
Ol mektep dırektorlaryn irikteý, taǵaıyndaý jáne olardy rotatsııalaý júıesi de mańyzdy ekenin aıtty. Uzaq talqylaýlardan keıin osy júıege engiziletin eleýli ózgeristerdi daıyndaǵanyn jeıtkizdi. «Bul týraly kelesi jazbamda tolyǵyraq aıtamyn», dep ýáde berdi.
