Ashat Aımaǵambetov mektepter qashan beınebaqylaýmen tolyq qamtylatyndyǵyn aıtty
«Elbasy men Memleket basshysy balalardyń, ásirese olardyń mektepte bolǵan kezderindegi qaýipsizdigine baılanysty máselege aıryqsha nazar aýdarady. Biz úshin balalardyń mektepte bolǵan kezindegi qaýipsizdigi ǵana mańyzdy emes. Ózderińizde bilesizder, balalardyń úıde bolǵan kezde terezeden qulap ketý jaıttary da kóp. Sondyqta ata-analar men mekteptiń jaýapkershiligin kúsheıtý jáne balalarymyzǵa qaýipsiz jaǵdaı jasaý úshin norma qabyldanady. Bul oraıda mektepterdi beınebaqylaýmen 100 paıyz qamtý jaıynda sóz bolyp otyr», - dedi mınıstr.
Onyń atap ótýinshe, balalardyń mekteptegi qaýipsizdigin qamtamasyz etý úshin qajetti sharalardy júzege asyrý qajet. Sonymen qatar ol respýblıkanyń barlyq mektepteri qaı ýaqytta 100 paıyz beınebaqylaýmen qamtylatyndyǵyn aıtty.
«Memlekettik baǵdarlama 2025 jylǵa deıin eseptelingen. Biraq, biz ary ketkende 1-2 jyldyń ishinde osynaý keshendi máseleler sheshilýi tıis dep esepteımiz. Beınebaqylaý boıynsha kelesi jyldyń sońyna deıin jergilikti basqarýdyń barlyq organdary bul máseleni sheshýi tıis degen mindet qoıyp otyrmyz. Bul aıta qoıarlyqtaı úlken problema emes. Balalardy qorǵaý men tasymaldaýdy qamtamasyz etý úshin 2025 jyldy kútýdiń qajeti joq», -dedi Ashat Aımaǵambetov.
Aıta keteıik, búgin Úkimet otyrysynda QR Bilim jáne ǵylym mınıstri Ashat Aımaǵambetov 2025 jylǵa deıin Qazaqstanda bilim men ǵylymdy damytýdyń jańa memlekettik baǵdarlamasyn tanystyrǵan edi.