Ashat Aımaǵambetov kompıýteri joq balalardyń problemasyn qalaı sheshpek
«Aýyldaǵy mektepterdiń kóbinde ınternet joq desek, ol tek aýyldaǵy mektepterge qatysty másele emes. Bizdiń keıbir úlken nemese shaǵyn qalalardyń ózinde jalpy tehnıkalyq múmkindik bolǵannyń ózinde biraz oqýshylarymyzdyń úılerinde múldem kompıýter joq. Tehnıkalyq múmkindigi bar balalardy ınternetke qosý máselesi de bar. Sondyqtan jergilikti atqarýshy organdar bul baǵytta jumysty bastap ketti. Tehnıkalyq múmkindigi bar, biraq, ınternetke qosylmaǵan balalardy ınternete qosý jumystaryn bastap, ákimdikter bul jumyspen qyzý aınalysýda», - dedi mınıstr.
Onyń atap ótýinshe, kompıýterdiń jetispeýshiligi de úlken másele bolyp tur.
«Interneti, tehnıkalyq múmkindigi bar, biraq kompıýteri joq degen 300 myńnan astam bala bar. Olarǵa qatysty aqparat jetkilikti. Sondyqtan bul máseleni sheshýdiń eki jolyn kórip otyrmyz. Birinshi - bizdiń mektepterdiń balansyndaǵy kompıýterlerdi balalarǵa ýaqytsha berý. Bul jumysty bastadyq. Mysaly, Nur-Sultan, Almaty qalalary belsendi júrgizip jatyr. Aıtalyq, Almaty qalasy 10 myńnan astam kompıýterdi taratyp úlgerdi. Mektepterdiń kompıýterlerin ýaqytsha paıdalaný boıynsha arnaıy aktimen ata-analarǵa, balalarǵa berip jatyrmyz», - dedi ol.
Ashat Aımaǵambetov mektep kompıýterleri de jetkiliksiz ekendigin jasyrmady.
«Sondyqtan biz qosymsha kompıýterler satyp alý jumysyn júrgizip jatyrmyz. Satyp alý jumysy bastaldy. Bizdiń oıymyzsha, 80 myńǵa jýyq kompıýter satyp alynady. Onyń ishinde kompıýterler, planshetter bar. Tıisti taldaý jasap kórdik. Jalpy, elimiz boıynsha osynsha kompıýter sany jetkilikti dep aıta almaımyz. Sondyqtan birneshe jerden izdep, kompıýter bar jerden kompıýter alyp, joq bola planshetter alyp, túrli joldaryn qarastyrý arqyly sheship jatyrmyz», - dedi mınıstr.
Onyń atap ótýinshe, ustazdarymyzdyń da keıbiriniń úıinde ınternet, keıbirinde kompıýter joq.
«Sondyqtan da ustazdarymyzdy da tıisti qural-jabdyqpen qamtý boıynsha jumys júrgizlip jatyr», - dedi elimizdiń bas muǵalimi.
