Ashat Aımaǵambetov: Qashyqtan oqytý kezindegi kemshilikter ornyn toltyrý úshin keshendi jumys júrgiziledi

NUR-SULTAN. QazAqparat – Qashyqtan oqytý kezindegi bilim sapasy kemshilikteriniń ornyn toltyrý úshin keshendi jumys júrgiziledi. Bul týraly búgin Úkimet otyrysynda QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Taǵy bir mańyzdy baǵyt – oqý protsesin beıimdeý. Biz jańa oqý jylyn dástúrli formatta bastaǵanmen qashyqtan oqytý kezindegi bilim sapasy kemshilikteriniń ornyn toltyrý úshin keshendi jumys júrgizýimiz qajet. Osy maqsatta keshendi, júıeli is-sharalardy júzege asyratyn bolamyz. Halyqaralyq tájirıbede júrgizilgen qashyqtan oqytýdyń nátıjesi de zertteldi. Soǵan sáıkes oqý jylynda negizgi pánder boıynsha byltyrǵy qıyn taqyryptarǵa kóbirek saǵat bólinip, oqý baǵdarlamalaryn túzetýge, nashar úlgeretin balalarmen qosymsha jumysqa basa nazar aýdarylady», - dedi Ashat Aımaǵambetov.

Onyń atap ótýinshe, pedagogtarǵa tsıfrlyq quzirettilikterin arttyrý úshin onlaın kýrstar daıyndaldy. 2 tamyzdan bastap muǵalimder kýrstan óte bastady.

«Sabaqtyń uzaqtyǵy 45 mınýt bolyp, kúndelikti baǵalaý júıesi ári qaraı jalǵasady. Bıyl 25 mamyrdan 19 maýsymǵa deıin uıymdastyrylǵan jazǵy mektep tájirıbesi negizinde kelesi oqý jylynda da 4 aptalyq jazǵy mektep uıymdastyrý boıynsha sheshim qabyldandy», - dedi mınıstr.