Ashat Aımaǵambetov qandaı qazaqstandyq avtorlardyń kitabyn oqýǵa keńes beredi
Mınıstr 2020 jyly «Oqýǵa qushtar mektep» aýqymdy respýblıkalyq jobasy iske qosylǵanyn eske saaldy. Onyń maqsaty – balalardy kórkem ádebıet oqýǵa baýlý.
«Jobany iske qosqanǵa deıin júrgizgen taldaý mektep kitaphanalarynda, ásirese qazaq tilinde zamanaýı kórkem ádebıettiń joq ekenin kórsetti. Osyǵan baılanysty ádebıettiń eń aldymen, qazaq tilinde qoljetimdi bolýyn jáne ǵylymı fantastıka janry men álem ádebıetiniń úzdik shyǵarmalarynyń basylymdar tizimine engizilýin basty nazarda ustadyq.
Mektepterdi kitappen qamtamasyz etý, kitaphanashylardyń jumysyn qaıta qaraý, jumys istep turǵan mektep kitaphanalary men kovorkıng ortalyqtaryn jóndeý jáne jańadan ashý, sondaı-aq balalar arasynda jarystar ótkizý, kitap oqýǵa 20 mınýt ýaqyt bólý jáne basqa da is-sharalar uıymdastyryldy», - dep jazady vedomstvo basshysy.
A.Aımaǵambetovtiń aıtýynsha, eki jylda mektep kitaphanalaryna 4 mıllıonǵa jýyq ádebıet satyp alyndy. Alaıda, joba barlyq óńirde birdeı sapaly júzege asyrylyp jatqan joq.
Sondaı-aq mınıstrdiń sózinshe, mektepterdegi demalys aımaqtarynda kitaphanalar uıymdastyrý josparda bar. Osyǵan baılanysty keste boıynsha ashylyp, kiltke jabyq turatyn dástúrli mektep kitaphanalarynan bólek, kitap oqýǵa, tipti úı tapsyrmasyn oryndaýǵa yńǵaıly bolatyn aımaq qurý kózdelip otyr.
«Qazirdiń ózinde «Oqýǵa qushtar mektep» jobasynyń oń áserin kórip otyrmyz. Suranystyń arqasynda usynys paıda bolyp, ol naryqtyń damýyna áser etti. Sońǵy jylda memlekettik tildegi aýdarma ádebıetter sany eseleı artty. Kitap oqýǵa degen qyzyǵýshylyqtyń artýy qazaq tilindegi kitaptardyń satylymyna da áser etip otyr, bıyl aıtarlyqtaı ósim tirkeldi.
Tipti oqyrman retinde qazaq tiline joǵary sapaly aýdarylǵan bestsellerlerdi jıi kezdestiremin. Mysaly, qazaq tilinde oqyǵan kitaptarymyzdyń biri – «Hárrı Potter» men «Ǵajaıyp» aýdarmalary.
Sapaly basylymdar men qazaqstandyq avtorlardyń kóbeıip kele jatqany da qýantady. Mysaly, jaqynda oqyǵan qazaqstandyq avtorlardyń tórt basylymy unady (onyń ishinde balalardyń):
1. Aqıqat Ras «ShkolaTA»
2. Rústem Saýytbaı «Shoko álem»
3. Zıra Naýryzbaeva «Altyn tostaǵandy izdeý. Batý men onyń dostarynyń bastan keshkenderi»
4. «Erketaı» komıksteri.
Kishkentaı balalarymyzǵa kitapty daýystap oqyp berýge, olardy qoldap, kitap oqýǵa baýlýǵa, ony satyp alyp berýge, kitap kórmelerine birge barýǵa shaqyramyn.
Árıne, balalarǵa ózimiz úlgi bolyp, oqýdyń mańyzdy ekenin kórsete bilýimiz mańyzdy», - deıdi Oqý-aǵartý mınıstri.
Foto: facebook.com/askhat.aimagambetov
