Ashat Aımaǵambetov ǵylymdy damytýǵa qatysty birqatar usynysty jarııalady

ASTANA. QazAqparat – Búgin Májiliste ǵylymdy damytý taqyrybyndaǵy Úkimet saǵatynda depýtat Ashat Aımaǵambetov salaǵa qatysty birqatar usynysty jarııalady, dep habarlaıdy QazAqparat tilshisi.

«Depýtattyq korpýs «Ǵylym jáne tehnologııalyq saıasat týraly» zań jobasyn daıyndap jatyr. Endi Úkimet tıisti qorytyndyny tez arada Májiliske engizýi tıis», - dedi A. Aımaǵambetov.

Sonymen qatar ol depýtattar men sarapshylardyń taǵy bir usynysyn aıtty. Aýyl sharýashylyǵy mınıstrligi men Mádenıet mınıstrliginiń joǵary oqý oryndaryn Ǵylym mınıstrliginiń qaramaǵyna berý kerek. Bul qadam saladaǵy sapany kóterýge yqpal etedi. Al Oqý-aǵartý mınıstrliginiń qaramaǵyna pedagogıkalyq ınstıtýttar men ýnıversıtetterdi aýystyrý qajet. Osy baǵyt bilim berýdiń barlyq deńgeıi úshin pedagogterdi daıarlaýdyń tutas modelin qurýǵa múmkindik beredi.

«Munymen qosa, tikeleı qarjylandyrýǵa jatatyn ǵylymı uıymdardyń sýbektilerin keńeıtý kerek. Olar – medıtsına, agrarlyq ǵylym, irgeli zertteýler. Bizdiń ǵalymdar konkýrsty kútip otyrmaı, kúndelikti qarajaty men tıisti jalaqysy bolýy tıis. Al konkýrstan utyp alsa, bul qarajat qosymsha qarjylandyrý retinde qarastyrylýy kerek», - dedi A. Aımaǵambetov.

Budan bólek ol ǵylymı jobalarǵa memlekettik ǵylymı-tehnıkalyq saraptama júrgizetin sarapshylarǵa qatysty jappaı revızııa júrgizýdi usyndy. Ol úshin sýbektıvızmdi alyp tastap, ǵylymı jumystardy bólý protsesin avtomattandyrý qajet.

«Ujymdyq paıdalaný zerthanalarynyń qyzmetin úılestirý úshin biryńǵaı e-lab platformasyn qurý óte mańyzdy. Sonymen qatar, qazaqstandyq ǵalymdardyń ǵylymı jýrnaldary men monografııalaryn basyp shyǵarý boıynsha arnaıy granttar bólýdi jańa zań jobasynda qarastyryp jatyrmyz. Budan bólek, Medıtsına ǵylymynyń ereksheligin eskere otyryp, medıtsınalyq ǵylymı zertteý ınstıtýttarynyń bazasynda medıtsınalyq joǵary oqý oryndarymen tyǵyz kollaboratsııa jasaý arqyly Dıssertatsııalyq keńes ashqan jón dep sanaımyz», - dedi depýtat.