Ashat Aımaǵambetov grantqa túse almaǵan talapkerlerge keńes berdi
ASTANA. KAZINFORM – Memlekettik bilim grantyn ıelene almaǵan talapkerler úshin grantqa túsýdiń jáne bilim alýdyń ózge de birneshe múmkindigi bar. Bul týraly burynǵy Májilis depýtaty Ashat Aımaǵambetov málimdedi.
Onyń aıtýynsha, grant konkýrsynyń nátıjesi talapker úshin barlyq múmkindik aıaqtaldy degendi bildirmeıdi.
– Bastysy – áli de grantty jeńip alýǵa múmkindik bar. Birinshiden, ákimdikterdiń granttary bar. Birneshe myń grant jergilikti bıýdjetten bólinedi. Ekinshiden, «Qazaqstan halqyna» qorynyń granttary taǵy bar, – dedi Ashat Aımaǵambetov.
Sondaı-aq keıbir talapkerler túrli sebeppen jeńip alǵan memlekettik grantynan bas tartýy múmkin. Mundaı jaǵdaıda bosaǵan granttar konkýrs nátıjesi men UBT-da jınaǵan balǵa sáıkes kelesi talapkerlerge beriledi.
Budan bólek, talapker joǵary oqý ornyna aqyly negizde túsip, keıin oqý úlgerimi joǵary bolǵan jaǵdaıda bilim alý barysynda bosaǵan grantqa úmitker bola alady. Ýnıversıtetterdiń óz ishki granttary da qarastyrylǵan.
– «Gap year» arqyly bir jyl daıyndalyp, qaıtadan UBT tapsyryp, grantty jeńip alýǵa bolady. Ol meniń óz basymnan ótken oqıǵa. Bul da jaqsy sheshim, – dedi ol.
Ashat Aımaǵambetov taǵy bir múmkindik retinde kolledjge túsýdi atady. Onyń sózinshe, kolledjderde grant sany kóp ári eńbek naryǵynda tehnıkalyq jáne kásiptik bilimi bar mamandarǵa suranys joǵary. Keıin kolledj túlegi oqýyn joǵary oqý ornynda jalǵastyra alady.
– Kórip otyrǵandaryńyzdaı, múmkindikter óte kóp. Bári alda. Tolyq málimet alý úshin ýnıversıtetterdiń qabyldaý komıssııasyna jolyǵý kerek, – dedi Ashat Aımaǵambetov.
Aıta keteıik, bıyl eń kóp bilim berý granty qandaı mamandyqtarǵa bólingenin mynaý siltemeden oqyńyz.
