Ashat Aımaǵambetov: Dıplom jasaýdy bızneske aınaldyrǵan oqý oryndarymen kúresýdemiz

NUR-SULTAN. QazAqparat - Memleket basshysynyń bilim jáne ǵylym salasyndaǵy tapsyrmalary oryndalyp jatyr. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Memleket basshysy Qasym-Jomart Toqaev bilim salasyna, ǵylym salasyn damytýǵa óte úlken kóńil bólýde. Prezıdent ótkizgen jınalystarynda, tapsyrmalarynda bilim jáne ǵylym salasyn aldyńǵy qatarǵa qoıyp otyr. Joǵary oqý ornyna qatysty biraz tapsyrma boldy. Dıplom jasaýdy bızneske aınaldyryp, ony beretindermen kúres júrgizip jatyrmyz. Birneshe ýnıversıtet jabyldy. Qazir indetke baılanysty tekseris júrgizý máselesinde qıyndyqtar bar», - dedi mınıstr Ortalyq kommýnıkatsııalar qyzmetindegi baspasóz máslıhatynda BAQ ókilderiniń saýalyna oraı.

Sonymen qatar ol mysal retinde elimizdiń ońtústiginde ornalasqan Óńirlik ýnıversıtetke qatysty máselege toqtaldy.

«Sol ýnıversıtettiń ózinde 35 myń bala boldy. Sol 35 myń bala oqıtyn ýnıversıtetti japtyq. Onda kóbine sabaq ótkizilmegen, tıisti deńgeıi joq. Osyndaı múshkil jaǵdaıda boldy. Munan ózge de birneshe ýnıversıtetti japqan edik. Qazirdiń ózinde sotta bizdiń biraz qujattarymyz jatyr. Óıtkeni, bul jumysty zańnama negizinde iske asyrýymyz qajet. Jumys ary jalǵasady, tapsyrmany oryndaý ústindemiz», - dedi Ashat Aımaǵambetov.