Ashat Aımaǵambetov bilim bıýdjetin oblystan aýdanǵa qaıtarýǵa qarsylyq bildirdi
ASTANA. KAZINFORM – Depýtat Ashat Aımaǵambetov Májilistiń jalpy otyrysynda bilim berý shyǵyndaryn oblystyq bıýdjetten aýdandyq deńgeıge qaıtarý týraly zań normasyna qarsy shyqty.
Aıta ketý kerek, búgin Májilis «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» zań jobasyn birinshi oqylymda maquldady. Osy qujatta bilim berý shyǵyndaryn oblystan aýdandarǵa qaıtarý týraly norma bar. https://kaz.inform.kz/news/zhana-oku-zhilinda-blm-byudzhet-oblistan-audandarga-berlu-mumkn-a2d3cb/
Ashat Aımaǵambetov bul normany qazirgi kúıinde qabyldaı salýǵa bolmaıtynyn aıtty.
- Qazir Qazaqstan mektepterinde 4 mln bala oqyp jatyr. Olar osy jerde qandaı zańdar qabyldanyp jatqanyn bilmeıdi. Olar bul túzetýlerge qarsy shyǵa almaıdy. Biraq olardyń taǵdyry myna zańǵa tikeleı zańǵa baılanysty. Problema mektepterdi qaıtadan aýdan ákimderine baǵyndyrýda. Bul – 4 mln balanyń bolashaǵyna qatysty sheshim. Iá, ákimderdiń ókilderi bar, ıá, aýdan ákimderiniń yqpaly men kúshin kórip otyrmyz. Ol durys ta, daýsyn jaqsy estip jatyrmyz. Al endi osy 4 mln balanyń atynan kim sóıleıdi? – dedi Ashat Aımaǵambetov.
Ol ózi Bilim jáne ǵylym mınıstri bolyp turǵan kezde jasalǵan reformany qaıta buzýdyń saldary qandaı bolatynyn tizip berdi.
- Men aýdandyq ákimdikte de, qalada da, oblystyq ákimdikte de jumys istedim. Bilim basqarmasyn 4 jyl basqardym. Sondyqtan bul salany bilemin. Mektepterdi oblystyq deńgeıge bergende biz ne kórdik? Elimizdegi mektepterdiń jartysyna jýyǵynda zańdy qujattar, tehnıkalyq tólqujattar, jer aktisi bolmady. Tipti jeri jeke menshikke ketip qalǵan jaǵdaılar boldy. Balalar zań júzinde joq ǵımarattarda oqyp keldi. Aýdandyq basqarý kezinde de 30 jyl dál osylaı boldy. Bıýdjettiń 95 paıyzy tek kommýnaldyq tólemder men jalaqyǵa ketetin. Damýǵa – nól deýge bolady. Satyp alýdan únemdelgen kez kelgen tıyndy aýdan ákimderi kóbinese basqa salaǵa alatyn. Mektepterge qarjy únemdeý tıimsiz boldy – bári bir ony tartyp alatyn. Ózim de solaı, sol deńgeıde jumys istegenmin, - dedi ol.
Aıtýynsha, eski basqarý júıesinde mektep árqashan basymdyqtar tiziminiń eń sońynda turatyn.
- Biz bilim salasyn osyndaı kúıge qaıtarǵymyz kele me, joq pa? 2021 jylǵy reforma ne berdi? Oblystyq vertıkal júıeniń 30 jyl boıy kórmegen aýdıtine aınaldy. Ondaǵan jyldar boıy jasyrylyp kelgen jemqorlyq shemalary áshkerelene bastady. Aýdanǵa qaıtarý osy júıege, osy kúıge qaıtý degendi bildiredi. Biz bilim berý feodalızmin joıdyq, bıýdjetti teńestirdik. Dotatsııalyq bıýdjet bar aýyldyń balasy alǵash ret qaladaǵy balamen birdeı oqýlyqqa, robot tehnıkasyna, pándik kabınetterge qol jetkizdik. 4 jyl ishinde halyqaralyq reıtıngterde turaqty ósim kórsetti. Biz pedagogti qoldadyq. Jyldar boıy muǵalimderdi buqaralyq jumystarǵa jegip kelgeni ol ashyq. Reofrmadan keıin muǵalim aqyry sabaq bere bastady, dırektor aqyry mektepti basqara bastady. 4 jylda naqty nátıje boldy. Al oǵan deıingi 30 jylda she? - degen depýtat bilim bıýdjetin gıbrıdti júıemen basqarýdy usyndy.
Ashat Aımaǵambetov kadrlar, dırektordy taǵaıyndaý, attestatsııa, metodologııa, oqý baǵdarlamalary sııaqty máseleni qamtıtyn bilim mazmuny oblysta qaldyrýdy usyndy.
- Al jylý, jaryq, shatyr, sanıtarııa, jóndeý qurylys, sııaqty sharýashylyq shyǵyny aýdan ákimderde bolsyn. Ákim ınfraqurylymǵa jaýap bersin. Biraq tolyǵymen bárin aýdan ákimdigine berilmeý kerek. Mektepte ne oqylatynyna ákim aralaspaý kerek, - dedi depýtat.
Eske salsaq, Prezıdent Qasym-Jomart Toqaev máslıhat depýtattarynyń ІІІ respýblıkalyq forýmynda ákimdiktegi bıýdjettik komıssııanyń quramyna bilimdi, bedeldi máslıhat depýtattaryn qosýdy usynǵan edi.
