Ashat Aımaǵambetov: Bilim kúni 1 qyrkúıekte onlaın rejımde ótkiziledi

NUR-SULTAN. QazAqparat – Tamyz aıynda balalar men ata-analarǵa arnap túrli taqyryptarda biryńǵaı synyp saǵattary ótkiziledi. Bul týraly Bilim jáne ǵylym mınıstri Ashat Aımaǵambetov málim etti, dep habarlaıdy QazAqparat tilshisi.

«Ata-analar men oqýshylar úshin ádistemelik qoldaý kórsetý mańyzdy. Sondyqtan tamyz aıynda balalarǵa jáne ata-analarǵa «Úıde qalaı oqý kerek?», «Gıgıena negizderi», «Kıbermádenıet», «Internet arqyly qalaı oqý kerek?», «Dene jattyǵýlarynyń mańyzy» sııaqty biryńǵaı synyp saǵattary, ata-analar jınalystary ótkiziledi. Bilim kúnin 1 qyrkúıekte onlaın rejıminde ótkizýdi josparladyq», - dedi mınıstr Úkimet otyrysynda.

Sonymen qatar ol jergilikti ákimdiktermen birlesip mektepterge tehnıka satyp alý boıynsha jumys júrgizilip jatqanyn jetkizdi.

«Tórtinshi toqsanda (ótken oqý jylynda) óz ınternet-platformalaryn usynǵan IT kompanııalar jaz mezgilinde aıtylǵan usynystar boıynsha oqý protsesine qajetti jańa fýnktsıonaldar jasap, qashyqtan oqytýdyń sapasyn kóterý turǵysynda birqatar jumysty aıaqtady. Mazmun materıaldaryn tolyqtyrýmen qatar, sabaqtardy jazý múmkindigi bar strımıngtik beınekonferentsııa modýlderin daıyndady. Oqý protsesin basqarýdyń avtomattandyrylǵan júıeleri, analıtıka, baǵalaý jáne basqa da múmkindikterdi ázirlendi», - dedi A. Aımaǵambetov.

Qazirgi kezde ár mektep IT kompanııalardyń ınternet platformalarynda pedagogtardyń suranystaryna jaýap beretin kez kelgen platformany tańdaýǵa quqyly. Osy qysqa merzimde birneshe jańa platformalar da naryqqa shyqty, básekelestik pen tańdaý bar.

Budan buryn habarlanǵandaı, mınıstr bastaýysh synyp oqýshylary úshin kezekshi synyptar ashylatynyn aıtty.

Sonymen qatar, jańa oqý jylynda kolledj stýdentteriniń bilim alý tártibin túsindirdi.