Ashat Aımaǵambetov bilim basqarmalarynyń basshylaryn synǵa aldy
«Bizdiń qoǵamda qalyptasyp qalǵan uǵym bar. Bilim salasyna qatysty bolǵannan keıin balabaqsha, mektep, bilim basqarmasy bolsyn – tikeleı qarjylandyryp, basqaryp, taǵaıyndap, jabdyqtap otyrady degen pikir qalyptasyp qalǵan. Aınalyp kelgende eń birinshi suraq ta, syn da mınıstrlikke túsedi. Biraq taǵy da aıta keteıik: «Qazaqstan Respýblıkasynyń bilim týraly» zańyna sáıkes bul máseleler tikeleı jergilikti ákimdikterdiń quzyretinde. Jergilikti bilim basqarmalary men bólimderi mektepterge, balabaqshalar men kolledjderge qatysty barlyq saıasatty iske asyrady. Qarjylandyrý da, jabdyqtaý da, kompıýter satyp alyp, ınternetpen qamtamasyz etý de jergilikti bıýdjetten bolady. Qoǵamda osy aıtylǵan máseleler kóp kóterilýde», - dedi Ashat Aımaǵambetov Bilim jáne ǵylym mınıstrliginiń apparattyq otyrysynda.
Mınıstrdiń aıtýynsha, jan basyna qarjylandyrý boıynsha bilim salasyn damytý úshin arnaıy nysanaly transfertterge qatysty da suraqtar týyndap jatyr.
«Nur-Sultan, Almaty men Shymkent qalasyn sanamaǵanda óńirlerde jan basyna qarjylandyrý júıesi iske asyrylady. Biraq qarajat bıylǵy jyldyń qańtar aıynan túsip otyr ǵoı. Bul degenimiz materıaldyq-tehnıkalyq bazaǵa jumsalatyn qarjyny sizder (oblystyq bilim basqarmalarynyń basshylaryna qarata) qańtar aıynan bastap ıgerýlerińiz kerek edi. Mektepterge bul qarajat sonda keregi joq pa? Qalaı túsinýge bolady? Memleket berip turǵan múmkindikti paıdalanbaǵan kezde árıne suraq óte kóp týyndaıdy», - dedi Ashat Aımaǵambetov.
