Ashat Aımaǵambetov biliktilikti arttyrý baǵdarlamalaryn jańartýdy tapsyrdy
«Biliktilikti arttyý jumysyndaǵy basymdyqtardy ózgertý kerek. Bul aıdan anyq. Birinshiden, sońǵy jyldary pán boıynsha kýrstar óte az ótkizildi. Kóbinese biz ádisteme boıynsha, basqa kýrstardy ótkizdik. Biraq pán boıynsha kýrstar óte az ótkizildi. Sondyqtan qazir bizden pedagogter pán boıynsha kýrstar ótkizýimizdi surap otyr», - dedi mınıstr vedomstvonyń apparat májilisinde.
Sondaı-aq, Ashat Aımaǵambetov biliktilikti arttyrý baǵdarlamasyn jańartyp otyrý kerektigin eskertti.
«5 jylda bir ret qana ótkiziletin aqysyz kýrstarmen muǵalimderdi tolyq qamtı almaı otyrmyz. Sondyqtan bul máseleni de sheshýimiz kerek. Jańa ǵana áriptesterimiz aıtty, baǵdarlamalardy tolyǵymen jańartý kerek. Bir baǵdarlamamen birneshe jyl jumys isteýge bolmaıdy. Onlaın tizilimdi qalyptastyryp, barlyq baǵdarlamalardy ornalastyrý qajet. Ol muǵalimderge de jalpy qoǵamǵa da qoljetimdi bolýy kerek. Neni úıretip jatqanymyzdy, qandaı baǵdarlamalarmen úırenip jatqanymyzdy bilýge múmkindik bolýy tıis», - dedi vedomstvo basshysy.
Mınıstr qashyqtan oqytý boıynsha jınalǵan tájirıbeni biliktilikti arttyrý isinde paıdalanýǵa bolatynyn aıtady.
«Pandemııa jaǵdaıynda bul tásilge beıimdelip qaldyq. Keıbir kýrstardy múmkindiginshe qashyqtan ótkizý óte mańyzdy. Kýrs ótkennen keıin de pedagogterge qoldaý kórsetý qajet. Dırektorlarǵa arnalǵan jáne tsıfrlyq saýattylyqty arttyrý úshin arnaıy kýrstardy júrgizý boıynsha tapsyrma berdik. Osy jumysty da belsendi júrgizýimiz kerek», - dedi jıyndy qorytyndylaǵan Ashat Aımaǵambetov.
Atalǵan sharada doktoranttardy daıyndaýda jaýapsyzdyq tanytqan retsenzentter dıssertatsııalyq keńes jumysynan shettetiletini aıtyldy.
Buǵan deıin habarlaǵanymyzdaı, Ashat Aımaǵambetov ǵylymı dáreje qorǵaýshylardan dıssertatsııanyń qazaq tilindegi nusqasy talap etiletinin aıtqan bolatyn.
