Balalardyń áleýmettik jelige tirkelýin jasyna qaraı shekteý usynyldy

ASTANA. KAZINFORM — Jasandy ıntellekt mınıstrligi mektepte smartfon qoldanýǵa tyıym salýǵa qarsy. Bul týraly vıtse-mınıstr Dmıtrıı Mýn Májilis depýtaty Ashat Aımaǵambetovtiń suraǵyna bergen jaýabynda aıtty. 

— Qazaqstanda 5-6 jastaǵy balalardyń ózi TikTok pen Instagram-da ata-ananyń rastaýynsyz-aq tirkele alady. Al basqa memleketterde jas shekteýin engizgen zańdar qabyldanyp jatyr. Mysaly, Danııada, Aýstralııada áleýmettik jelige tirkelýge quqyq beretin jas — 15-16 jas. AQSh, Ulybrıtanııada, Irlandııada ata-ananyń arnaıy ruqsaty, rastaýy kerek. Oqý-aǵartý mınıstrligi men Jasandy ıntellekt mınıstrliginiń osy máseledegi ustanymy qandaı? Mektepterde smartfon qoldanýǵa memlekettik ustanym bar ma? Anglııa, Nıderland sııaqty álemniń 40 paıyzdan astam memleketterinde tyıym salý týraly sheshim qabyldady. Bizdegi keıbir aldyńǵy qatardaǵy mektepter de osy tájirıbeni engizip, nátıjesinde balalardyń úlgerimi artty. Tsıfrlyq kodeks aıasynda osy máseleni qalaı retteýge bolady, — dep surady Ashat Aımaǵambetov.

Jasandy ıntellekt mınıstriniń orynbasary Dmıtrıı Mýn álem balalardyń áleýmettik jelide tirkelýin jappaı tyıym salý arqyly emes, olar tutynatyn mazmundy ekshep usyný arqyly rettep jatqanyn aıtty.

— Áleýmettik jelilerde ata-ananyń baqylaýynsyz tirkelýge qatysty aıtsaq, qazir álem kerisinshe áleýmettik jelige qol jetkizýdiń túrli joldaryn usyný jaǵyna jyljyp jatyr. Biraq belgili bir jas shekteýleri, mazmundy ekshep usyný tájirıbesi bar. Balalardyń zaman aǵymynan, tehnologııadan kenje qalmaı damýyna da basymdyq berilip otyr. Sondyqtan bizde de osyndaı formatta jumys júrgiziledi, — dedi vıtse-mınıstr.

Al Tsıfrlyq kodeks aıasynda mektepte smartfon qoldanýǵa tyıym salý kózdelmegen.

— Bizdiń mınıstrliktiń ustanymy — jas urpaqty zaman aǵymynan keıin qalý táýekelinen qorǵaı otyryp, jumysta ınternet múmkindikterin, jasandy ıntellektini paıdalanýdy úıretý qajet, — dedi Dmıtrıı Mýn.

Aıta ketý kerek, Tsıfrlyq kodekstiń jobasynda tsıfrlyq derekterdi zań júzinde múlik retinde moıyndaý kózdelip otyr.