Ashat Aımaǵambetov aýyldyń daryndy balalary qalaı anyqtalatynyn aıtty
NUR-SULTAN. QazAqparat - Aýyldardyń, shaǵyn qalalardyń daryndy balalaryn qoldaýdyń jańa tujyrymdamasy ázirlendi. Bul týraly búgin Úkimet otyrysynda QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.
«Daryndy balalardy anyqtaýdyń qoldanystaǵy júıesi aýyldaǵy jáne shaǵyn qalalardaǵy daryndy balalardy anyqtap, qoldaýǵa óte az múmkindik beredi. Olımpıadalarǵa, konkýrstarǵa kóbinese qalanyń gımnazııa, lıtseı oqýshylary qatysyp, jeńip, aýyl balalary tasada qalatyny jasyryn emes. Osyǵan oraı, mınıstrlik Tuńǵysh Prezıdent qorymen birge daryndy balalardy qoldaýdyń jańa tujyrymdamasyn ázirledi», - dedi ol.
Mınıstrdiń aıtýynsha, endi basty nazar aýyldyq jerlerdegi jáne monoqalalar balalaryna bólinedi. Іrikteý krıterııleri teorııalyq bilim emes, logıkalyq oılaý jáne praktıkalyq daǵdyǵa negizdeledi.
«Bıyl «Mektepke jol» aktsııasy boıynsha mınıstrlik qosymsha sharalardy qoldady. Ol 1 shildeden bastalyp ta ketti. Kómekke muqtaj balalardy barynsha qamtý maqsatynda eriktilerdi tarta otyryp, jyljymaly pýnkter men utqyr toptardy uıymdastyrý josparlanǵan. Jalpy, Memleket basshysynyń tapsyrmalary boıynsha mınıstrlik tarapynan tıisti sharalar qabyldanyp, sapaly oryndalatyn bolady», - dedi Ashat Aımaǵambetov.
