Ashat Aımaǵambetov attestat tapsyrý men sońǵy qońyraýdy ótkizý talaptaryn aıtty
«Sońǵy qońyraý is-sharasyn 9 jáne 11- synyp bitirýshilerine sanıtarlyq talaptardy qatań saqtaı otyryp, ashyq aýada ótkizýge ruqsat berilip otyr. Bul oqýshylar úshinshi toqsannan bastap negizinen dástúrli formatta ári onlaın formatta oqydy. Sondyqtan bul eki sheshim bir-birimen úılesip otyr. Attestat berý rásimin de osyndaı formatta ótkizýdi josparlanyp otyrmyz. 9 jáne 11- synyp túlekteri úshin qabyldanǵan osyndaı sheshimdi der kezinde ata-analaryna jetkizip, tıisti daıyndyq jumystaryn ótkizý kerek», - dedi mınıstr vedomstvonyń apparat jınalysynda.
Osy oraıda A.Aımaǵambetov maska taǵý rejımin, áleýmettik ara qashyqty, sondaı-aq basqa da sanıtarlyq talapty saqtaý boıynsha naqty jumysty júrgizýdi tapsyrdy. Osy talaptar saqtalǵanda jáne ashyq taza aýada ótkizgende ǵana tıisti ruqsat beriledi.
«Qorytyndy attestattaý týraly kóp talqylandy. Osy baǵytta naqty aqparat, ádistemelik usynystar jiberildi. Sondyqtan bul másele boıynsha daý-damaı týǵyzbaı, tıisti deńgeıde uıymdastyrý kerek», - dedi mınıstr.
Bul turǵyda Ashat Aımaǵambetov attestattaýǵa qatysty atqarylatyn jumysty, qabyldanǵan sheshimdi ata-analarǵa, mektep bitirýshilerge durystap jetkizip, túsindirý kerektigin tapsyrdy.
Budan buryn habarlanǵandaı, sońǵy qońyraý ádettegideı 25 mamyrda ótkiziledi. Bıylǵy shekteý is-sharalary eskerilip, birneshe format usynylmaq. Birinshiden, dástúrli túrde ashyq taza aýada 9 jáne 11-synyp oqýshylary úshin, sondaı-aq 300-ge deıin oqýshysy bar ári osy ýaqytqa deıin shtattyq rejımde oqytyp kele jatqan mektepter ótkizedi.
Sonymen qatar QR Bilim jáne ǵylym vıtse-mınıstri Sholpan Karınova mektep túlekteriniń qorytyndy attestattaýyna qatysty túsinik berdi.
