Ashat Aımaǵambetov Amanat partııasynyń Májilis saılaýyna úmitkerler tizimine endi

ASTANA. QazAqparat – Burynǵy Oqý-aǵartý mınıstri Ashat Aımaǵambetov Amanat partııasynyń Májilis saılaýyna úmitkerler tizimine endi, dep habarlaıdy QazAqparat tilshisi.

Sezd delegattary partııa atynan Májilis saılaýyna usnylatyn kandıdattar tizimin biraýyzdan maquldady. Solardyń ishinde Ashat Aımaǵambetov te bar.

Aıta keteıik, sezd barysynda sóılegen sózinde Ashat Aımaǵambetov 21 jasta jergilikti máslıhat depýtatynyń mandatyn qalaı atqarǵanyn eske aldy.

«Men bul ýaqytta eki máseleni túsindim. Birinshisi – jalǵyz depýtat úlken, júıeli máselelerdi sheshe almaıdy. «Jalǵyzdyń úni shyqpaıdy», - deıdi ǵoı. Ekinshi másele – elimizde úlken, saıası transformatsııa bolmasa, onda bul bastamalar beker, úlken júıeli máseleler sheshilmeıdi. Qazirgi ýaqytta, meniń oıymsha, elimizde úlken ózgerister oryn alyp jatyr. Osy ózgeristerdiń bir zańdy jalǵasy retinde qazir bolaıyn dep jatqan saılaýdy kóremin. Osy saılaý bizdiń elimizdi túbegeıli ózgertýge múmkindikter beredi dep oılaımyn. Ózgerister týraly kóp aıtamyz. Biraq sol ózgerister bolý úshin bizge senim paıda bolý kerek. Al senim paıda bolýy úshin naqty ister kerek. Halqymyz ár túrli bos urandardan, ár túrli ádemi josparlardan, ár túrli ádemi slaıdtardan sharshady. Naqty ispen dáleldeý kerek», - dedi Ashat Aımaǵambetov.

Buǵan deıin sezd delegattarynyń sheshimimen Jetisý jáne Ulytaý oblystarynyń ákimderi Amanat partııasy saıası keńesiniń quramynan shyǵarylǵan bolatyn.