Ashat Aımaǵambetov Almatyda JOO stýdentterimen kezdesti

ALMATY. QazAqparat – QR Bilim jáne ǵylym mınıstri Ashat Aımaǵambetov Almatyda joǵary oqý oryndarynyń stýdentterimen kezdesti. Bul týraly mınıstr óziniń Facebook paraqshasynda jazdy, dep habarlaıdy QazAqparat.

«Abaı atyndaǵy QazUPÝ stýdentterimen kezdestim. Sonymen qatar Qyzdar pedagogıkalyq ýnıversıtetiniń jataqhanasynda bolyp, onda turatyn stýdenttermen de áńgimelestim.

Kózderi janyp turǵan jastarmen jıi kezdesemin jáne olardyń shyǵarmashylyq ıdeıalary men keıde qıyn suraqtaryn qýana tyńdaımyn.

Bul joly bolashaq ustazdarmen túlekterdiń kásibı attestattaý taqyrybyn talqyladyq.

Sondaı-aq muǵalimderdiń mansaptyq perspektıvalary, mektep pen ýnıversıtet arasyndaǵy ózara baılanys, pedagogıkalyq tájirıbedegi ózgerister jáne kez kelgen jumysta ustanýǵa tıis prıntsıpter, ıaǵnı akademııalyq adaldyqtyń mańyzy týraly áńgime órbittik. Kóptegen suraq pen qyzyqty ıdeıaǵa toly kezdesý boldy»,-dep jazdy mınıstr.