Ashat Aımaǵambetov ákimderden turǵyn úı alaptarynda eń birinshi mektep salýdy surady

NUR-SULTAN. QazAqparat – Turǵyn úı alaptaryn josparlaý kezinde bilim berý obektileriniń qurylysy eskerilmeı, saldarynan oryn tapshylyǵy týyndap jatyr. QR Bilim jáne ǵylym mınıstri Ashat Aımaǵambetov Úkimet otyrysynda osy problemany kóterdi, dep habarlaıdy QazAqparat tilshisi.

«Turǵyn úı alaptaryn josparlaý kezinde kóbinese bilim berý obektileriniń qurylysy eskerilmeıdi. Osydan oqýshy oryndarynyń jetispeýshilik problemalary týyndaıdy. Osyǵan oraı, turǵyn úı qurylysy jumystaryn bastar aldynda ákimdikterge birinshiden mekteppen qamtamasyz etýdi suraımyn», - dedi mınıstr.

Onyń aıtýynsha, búgingi tańda 2500 oqýshyǵa arnalǵan mekteptiń tıptik jobasy ázirlengen. Endi 1500, 2000, 3000 oqýshyǵa arnalǵan mektepterdiń úlgilik jobalaryn ázirleý qajet.

«Salynatyn mektepterde mamandandyrylǵan kabınetter, zamanaýı jabdyqtalǵan ámbebap sheberhanalar, keminde eki sport zaly, kitaphana, medıateka jáne oqý zaldary bolýy tıis. Bul úshin biz qazir mektepterdi jabdyqtaýǵa qoıylatyn talaptardy kúsheıtip jatyrmyz», - dedi vedomstvo basshysy.