Ashat Aımaǵambetov: 3,2 mln oqýshy qashyqtan oqyp jatyr
NUR-SULTAN. QazAqparat – Internetti qoldaný arqyly qashyqtan oqýǵa kóshken oqýshylar sany 2,4 mln-ǵa jetti. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.
«Búgin elimizdegi oqýshylar úshin tórtinshi toqsan bastaldy. Bul toqsan biz úshin erekshe, sebebi qashyqtyqtan oqytý boıynsha alǵash ret jumysty bastap otyrmyz. Qysqa merzim ishinde daıyndyq jumystaryn júrgizgen bolatynbyz. Bilim salasy úshin, bárimiz úshin bul úlken emtıhan, sonymen qatar úlken múmkindik. Osy tájirıbeden keıin bilim salasy ózgeretini aıdan anyq. Qysqa merzim ishinde áriptesterimiz jańa quzirettilik alyp, qashyqtyqtan oqytý formatyna óte jyldam beıimdeldi», - deıdi Ashat Aımaǵambetov Ortalyq kommýnıkatsııalar ortalyǵynda ótken onlaın brıfıngte.
Sondaı-aq, ol búgingi birinshi kúnniń negizgi nátıjesine toqtalyp ótti.
«Ońaı bolmasa da, qashyqtyqtan oqý formatyna kóshtik. Birinshiden, 3,2 mln oqýshy ártúrli baǵyt boıynsha qashyqtyqtan oqýdy bastady. Keıbiri arnaıy daıyndalǵan ınternet baǵdarlamasy negizinde oqýyn bastasa, basqalary telearna arqyly oqýdy bastady. Internet júıesi arqyly birneshe ınternet platforma arqyly jumys júrgizip otyrmyz. Onyń ishinde bárimiz úırenip qalǵan Kúndelik, Daryn-onlaın jáne taǵy da basqa platformalar bar», - deıdi mınıstr.
Sonymen qatar, mınıstr qashyqtan bilim alýdyń buryn bolmaǵan rekordy týraly aıtty.
«Jalpy ınternetti qoldaný arqyly qashyqtyqtan oqýǵa kóshkender sany búgingi kúni 2,4 mln oqýshyǵa jetti. Kúndelik platformasynda bir kún ishinde 2,2 mıllıon oqýshy tańǵy saǵat 07:00-den qazirgi ýaqytqa deıin jumys isteýde. Mundaı buryn sońdy bolmaǵan. Daryn-onlaın qosymshasyn tirkelip, daıyndalǵan vıdeony qarap, bilim alýǵa bolady. Vıdeo sabaqtar bitkennen keıin naqty sol pán boıynsha beriletin suraqtarǵa jaýap berýge bolady. Jaýap qate bolsa vıdeony qaıtadan qarap, qateliktermen jumys isteýge múmkindikter qarastyrylǵan. Daryn-onlaınǵa 300 myńǵa jýyq oqýshy tirkelip, bilim alýda», - dep tolyqtyrdy Ashat Aımaǵambetov.
