Ashat Aımaǵambetov 2025 jylǵy bıýdjettegi basty ózgeristerdi jarııa etti
ASTANA. KAZINFORM — Májilis depýtaty Ashat Aımaǵambetov 2025 jylǵy respýblıkalyq bıýdjetti qaraý kezinde engizilgen mańyzdy ózgerister men túzetýler týraly málimdedi. Ol bul týraly óziniń resmı paraqshasynda jazba jarııalady.
Májilis depýtaty Ashat Aımaǵambetov 2025 jylǵy respýblıkalyq bıýdjetti talqylaý barysynda depýtattar engizgen naqty ózgeristerdi jarııa etti. Onyń aıtýynsha, halyq jıi qoıatyn «Bıýdjetti qaraǵanda naqty ne istedińizder?» degen oryndy suraqqa jaýap retinde, osy jolǵy bıýdjette mańyzdy áleýmettik baǵyttarǵa qosymsha qarjy bólingen.
Densaýlyq saqtaý salasynda — 37 mlrd teńge qosymsha qarjy
- 20 mlrd teńge — onkologııalyq naýqastardy emdeýge;
- 5 mlrd teńge — onkogematologııalyq aýrýlardy (leıkemııa jáne t. b.) emdeýge;
- 8 mlrd teńge — gemodıalız qyzmetin qarjylandyrýǵa;
- 4 mlrd teńge — pallıatıvtik kómek kórsetýge bólindi.
Aımaǵambetov bul qarajattardyń artynda tek sandar emes, «adamdardyń taǵdyry men ómiri turǵanyn» atap ótti.
Bilim salasyna qosymsha qoldaý
Bıýdjetten 402 mln teńge qaıta bólindi. Atap aıtqanda:
- Halyqaralyq pándik olımpıadalarǵa daıyndyqqa,
- Mekteptegi robototehnıka men ǵylymı jobalarǵa,
- Debat qozǵalysyn damytýǵa jumsalady.
Qazaq tildi mádenı kontentti qoldaý
- 300 mln teńge — qazaq tilindegi anımatsııalyq mýltfılmder óndirisine jáne olardyń ınternette taralýyna bólindi;
- «XXI ǵasyr kóshbasshysy» jáne «Azamat» sııaqty tanymdyq telebaǵdarlamalar efırge qaıta oralady;
- «Jaıdarman» jobasyna qoldaý kórsetildi;
- «Astana Opera» teatry ujymynyń jalaqysyna da qarjy qarastyrylǵan.
Sý qaýipsizdigi jáne ǵylym
Geografııa jáne sý qaýipsizdigi ınstıtýtynyń ınfraqurylymyn jańartýǵa 189 mln teńge bólindi.
Ashat Aımaǵambetov aldaǵy ýaqytta 2026 jylǵa arnalǵan bıýdjet jobasyna engiziletin túzetýler týraly da bólek jazba jarııalaıtynyn aıtty.
— Bıýdjetti talqylaýda tek óz óńirińniń máselesine ǵana emes, barsha azamat úshin mańyzdy júıeli suraqtarǵa nazar aýdarý mańyzdy, — dedi depýtat.
Osydan buryn Ashat Aımaǵambetov Ekonomıkalyq yntymaqtastyq jáne damý uıymy júrgizgen TALIS-2024 halyqaralyq zertteýiniń nátıjesi týraly jazba jarııalady.