«Asharshylyq» tarıhı dramasyndaǵy rólderdiń birine Robert De Nıro shaqyrylmaq

- Marına, qyrkúıek aıynda «Asharshylyq» dramasynyń túsirýge qazaqstandyqtardan 38 mln teńge jınalý kerektigin aıtqansyzdar. Kraýdfandıng qalaı júrip jatyr, qajetti soma jınaldy ma?

 

- Kraýdfandıng júrip jatyr, biraq biz oılaǵandaı emes. Al, eýropalyq demeýshilerimiz kerisinshe belsendi. Eýropalyq kıno qory bizge fılmdegi rólderdiń birine AQSh akteri Robert de Nırony shaqyrý týraly usynys jasady. Eýropalyq taraptan bizde esh qıyndyq joq.

- Robert De Nıroǵa qandaı ról berilmek?

- Bul máseleni áli de talqylaý ústindemiz, sebebi bizdiń bıýdjetimiz óte az. Robert De Nırony jobaǵa tartý úshin bizge eki mindet qoıyldy. Onyń biri - akterdiń róline baılanysty stsenarııdi qaıta jazyp shyǵý. Ekinshisi, qazaqstandyq taraptyń qarjylyq shyǵynnyń jartysyn jabýy qajet bolyp tur. Eýropalyqtar ortaq joba bolǵandyqtan qazaqstandyqtardyń da belsendirek bolǵanyn qalaıdy.

- Fılmdi túsirý jumystary qarasha aıynda bastalady dep josparlanǵan edi, naqty sharalar bastaldy ma?

- Jalpy, fılm boıynsha alǵa jyljý bar. Robert De Nıronyń róline baılanysty stsenarııdi qazir qaıta qarap jatyrmyn, aldaǵy bir-eki apta ishinde naqty belgili bolady.

 

- Ýaqyt bólip suhbattasqanyńyzǵa rahmet.

Eske sala keteıik, 2017 jyldyń qyrkúıek aıynyń 14-inde «MG production» kınokompanııasy «Start taım» kraýdfandıng platformasymen birlese otyryp, «Asharshylyq» tarıhı dramasyn túsirý jumystaryn bastaıtynyn málim etken bolatyn. Fılm 1931-1933 jyldar aralyǵynda qazaq halqynyń basynan ótken asharshylyq taqyrybyna arnalǵan.

«Bul fılmdi túsirýge qajet qarajattyń jartysyn eýropalyq kıno qory bergeli otyr. «MG production» kınokompanııasy da óz kúshin, tehnıkalyq múmkindigin beredi. Al, halyqtan, kraýdfandıng arqyly qajet somanyń 10 paıyzyn ǵana jınamaqpyz. Naqtyraq aıtqanda, biz halyqtan 38 mln teńge jınaý qajet. Qarjy jınaý aktsııasy 31 jeltoqsanǵa deıin jalǵasady. 38 myń qazaqstandyq 1 000 teńgeden kómektesse, sol qarjyny jınaı alamyz. Bul - úlken asar. Tarıhymyz úshin barlyǵymyz birigip kómekteseıik. Kómektesken qazaqstandyqqa tsıfrlyq formattaǵy dısk beriledi», - degen bolatyn «Start taım» kraýdfandıng platformasynyń jobalar boıynsha dırektory Ázıza Ótegenova.

Túsirý tobynyń aıtýynsha, fılm 2017 jyldyń qarasha aıynda bastalyp, 2018 jyldyń aqpan aıynda aıaqtalady. 2018 jyldyń kúzinde álemdik prokatqa shyǵady. Fılmniń uzaqtyǵy - 103 mınýt.

Aıta keteıik, Qazaqstanda alǵash ret kraýdfandıng arqyly «Qazaq eli» tarıhı kınosyna qarajat jınaý júrgizilgen bolatyn. Onda qazaqstandyqtar 1,3 mln teńge jınaǵan bolatyn.