«Asharshylyq» tarıhı dramasyn túsirýge 38 myń qazaqstandyqtyń kómegi kerek
ALMATY. QazAqparat - «Asharshylyq» tarıhı dramasyn túsirýge qazaqstandyqtardan 38 mln teńge qarajat qajet. Bul týraly búgin fılm túsirýshilermen ótken baspasóz máslıhatynda «Start taım» kraýdfandıng platformasynyń jobalar boıynsha dırektory Ázıza Ótegenova aıtty, dep habarlaıdy QazAqparat tilshisi.
Búgin Almaty qalasynda «MG production» kınokompanııasy «Start taım» kraýdfandıng platformasymen birlese otyryp «Asharshylyq» tarıhı dramasyn túsirý jumystaryn bastaıtynyn málim etti. Fılm 1931-1933 jyldar aralyǵynda qazaqhalqynyń basynan ótken asharshylyq taqyrybyna arnalmaq.
«Bul fılmdi túsirýge 1 mln AQSh dollary kóleminde qarajat qajet. Ol qarajattyń jartysyn eýropalyq kıno qor bergeli otyr. «MG production» kınokompanııasy da óz kúshin, tehnıkalyq múmkindigin beredi. Al, halyqtan, kraýdfandıng arqyly qajet somanyń 10 paıyzyn ǵana jınamaqpyz. Naqtyraq aıtqanda, biz halyqtan 38 mln teńge jınaýymyz qajet. Qarjy jınaý aktsııasy 31 jeltoqsanǵa deıin jalǵasady. 38 myń qazaqstandyq 1 000 teńgeden kómektesse, sol qarjyny jınaı alamyz. Bul - úlken asar. Tarıhymyz úshin barlyǵymyz birigip kómekteseıik. Kómektesken qazaqstandyqqa tsıfrlyq formattaǵy dısk beriledi», - dedi Ázıza Ótegenova.
«Asharshylyq» fılminiń stsenarısi Marına Kýnarovanyń aıtýynsha, fılmdi túsirý jumystary qarasha aıynda bastalmaq.
«Fılm Qazaqstan aýmaǵynda túsiriledi. Túsirilim qys mezgilinde júrýi kerek. Fılm 2017 jyldyń qarasha aıynda bastalyp, 2018 jyldyń aqpan aıynda aıaqtalady. 2018 jyldyń kúzinde álemdik prokatqa shyǵady. Fılmniń uzaqtyǵy - 103 mınýt. Eýropalyqtar stsenarıımen tanysyp shyqqannan keıin birden qoldaý bildirdi», - dedi Marına Kýnareva.
Eske sala keteıik, Qazaqstanda alǵash ret kraýdfandıng arqyly «Qazaq eli» tarıhı kınosyna qarajat jınaý júrgizilgen bolatyn. Onda qazaqstandyqtar 1,3 mln teńge jınady.
