«Asharshylyq» tarıhı dramasy: Robert De Nıro úshin arnaıy stsenarıı jazyldy
ALMATY. QazAqparat - Gollıvýd juldyzy Robert De Nıronyń «Asharshylyq» fılmindegi róli úshin arnaıy stsenarııi jazyldy. Bul týraly atalǵan fılm rejısseri Marına Kýnarova aıtty, dep habarlaıdy QazAqparat tilshisi.
Endi akter kınoǵa túsý úshin Qazaqstanǵa 25 kúnge kelýi múmkin.
«Stsenarıı jazyldy. Qazir ony aǵylshyn tiline aýdarý jumystary júrip jatyr. Robert De Nıro shamamen 25 kúnge kelýi yqtımal. Oǵan berilgen ról mańyzdy, sondyqtan Qazaqstanda uzaq bolýy qajet. Osy máseleni jáne qarjylandyrý jaǵyn sheshýge tyrysyp jatyrmyz», - dedi Marına Kýnarova.
Aıta keteıik, buǵan deıin «Asharshylyq» tarıhı dramasynyń rejısseri Marına Kýnarova Robert De Nıro úshin stsenarıı qaıta jazylatynyn aıtqan bolatyn.
«Asharshylyq» tarıhı dramasy 1931-1933 jyldar aralyǵynda qazaq halqynyń basynan ótken náýbet týraly. Fılmdi «MG production» kınokompanııasy «Start taım» kraýdfandıng platformasymen birlese otyryp túsiredi. Sonymen qatar, Eýropalyq kıno qor da fılmdi qarjylandyrýǵa at salyspaq. Robert De Nırony fılmge tartýdy eýropalyq tarap usynǵan bolatyn. «QazAqparat» tilshisine bergen suhbatynda rejısser oǵan fılm bıýdjeti az ekenin jáne stsenarııdi qaıta jazyp shyǵý qajettigin eskertken.
Fılmdi túsirý 2018 jyldyń aqpan aıynda aıaqtalady dep josparlanǵan. Al prokatqa 2018 jyldyń kúzinde shyǵady. Fılmniń uzaqtyǵy - 103 mınýt.
