Asharshylyq shyndyǵyna arnalǵan kitap shyǵady
ASTANA. 3 sáýir. QazAqparat - HH ǵasyrdyń 30-ynshy jyldarynyń basynda mıllıondaǵan qazaqstandyqtardyń ómirin qurban etken qasiretti oqıǵa Uly zulmattyń 80 jyldyǵy qarsańynda «Asharshylyq shyndyǵyna» arnalǵan kitap jaryq kórmek.
Bul týraly búgin «1930 jyldary KSRO-daǵy «Asharshylyq» pen «Terrordyń» aýqymdylyǵy men yqpalyn túsindirýdegi jańa kózqarastar» atty dóńgelek ústelge baılanysty jýrnalısterge bergen suhbatynda Bilim jáne ǵylym mınıstrligi Memleket tarıhy ınstıtýtynyń dırektory Búrkitbaı Aıaǵan málim etti.
«Elbasynyń tapsyrmasyna sáıkes, Memleket tarıhy ınstıtýtynyń ǵalymdar toby 1928-1933 jyldardaǵy Qazaqstanda oryn alǵan asharshylyq shyndyǵy jóninde aýqymdy jobany aıaqtap qaldyq. Uly zulmat negizinen osy aralyqtaǵy 5 jyldy qamtyǵanymen, asharshylyqtyń áserli aýqymy odan da uzaǵyraq merzimde boldy. Biz osy asharshylyq shyndyǵyna qatysty kitappen jumys barysynda Nazarbaev ýnıversıtetiniń Gýmanıtarlyq jáne Áleýmettik zertteýler mektebiniń oqytýshylarymen tyǵyz baılanysta boldyq. Osy Ýnıversıtettiń shaqyrtýymen elimizge batystyq belgili tarıhshy Stıven Ýıtkorft kelip otyr», - deıdi B. Aıaǵan.
Onyń aıtýynsha, atalǵan kitap aǵymdaǵy jyldyń mamyryna qaraı jaryq kóretin bolady. Kitapqa alǵysózdi jazatyndardyń arasynda professor Stıven Ýıtkroft ta bar. Professor Ýıtkroft Melbýrn ýnıversıtetiniń janyndaǵy Eýrazııa jáne Reseı zertteý ortalyǵynyń negizin salýshy, áleýmettik ǵylymdarynyń Avtralııalyq akademııasynyń múshesi. Ol tóńkeris aldyndaǵy Reseı jáne Keńestik júıeniń ekonomıkalyq tarıhyn, asharshylyq máselelerin tereń zerttegen batystyq ǵalymdardyń biregeıi.
