Asharshylyq máselesine qatysty zertteý ortalyǵyn qurý kerek - senator

ASTANA. QazAqparat - Búgin Senattyń jalpy otyrysynda depýtat Murat Baqtııaruly asharshylyq máselesine qatysty ǵylymı zertteý ortalyǵyn qurýdy usyndy. Osy oraıda ol QR Úkimet basshysy Baqytjan Saǵyntaevtyń atyna depýtattyq saýal joldady, dep habarlaıdy QazAqparat.

 «Ótken 20 ǵasyrdyń otyzynshy jyldaryndaǵy ashtyq adamzat balasy tarıhyndaǵy jan túrshiktirer eń zulmat, aýyr qasiret bolyp qaldy. Keńestiń júıe kezindegi bul náýbetten eń aýyr zardap shekken Qazaqstan bolatyn, biraq osy asharshylyq náýbeti uzaq jyldar boıy asa qupııa bolyp aıtylmady. Tek elimiz Táýelsizdik alǵannan keıin ǵana Tuńǵysh Prezıdentimiz Nursultan Nazarbaevtyń pármenimen asharshylyq jáne onyń zardaptary zerttelip, bul náýbettiń qasiretin búgingi óskeleń urpaqtyń bilýine, ultymyzdyń osy bir zobalań kezeńdi, sondaı-aq onyń qurbandaryn únemi este ustap otyrýyna múmkinshilik jasaldy», - dep toqtaldy senator.

Murat Baqtııarulynyń paıymynsha, asharshylyqtyń zalaly men zardabyn áli de naqtylaı túsý qajet. Sondyqtan Qazaqstan tarıhyndaǵy osy náýbetti kezeńdi este qaldyrý úshin Úkimet aldaǵy ýaqytta birqatar máselelerge nazar aýdarýy tıis.

«Úkimet deńgeıinde otandyq jáne halyqaralyq mol tájirıbesi bar sarapshylardy tarta otyryp, tarıhı qujattar men faktilerdiń negizinde asharshylyqtyń qurbany bolǵan otandastarymyzdyń birtutas memlekettik reestrin jasaý úshin asharshylyq máselesine qatysty ǵylymı zertteý ortalyǵyn qursa. Ekinshiden, Úkimet deńgeıinde qýǵyn-súrginniń qasiretine jáne asharshylyq qurbandaryna resmı quqyqtyq-saıası baǵa beriletin arnaıy sheshim shyǵarylýy tıis. Úshinshiden, zulmat asharshylyqtyń saldary áli de bolsa keńinen aıtylyp, barlyq aqparat quraldary men arnaıy kınofılmder arqyly jas urpaqqa tereń jetkizý -  bizdiń mindetimiz»

Sonymen qatar depýtat asharshylyq tarıhy men onyń zardabyn ózge bir halyqtan kek alý úshin saıası oıyn quraldaryna aınaldyrýǵa bolmaıtynyn qadap aıtty.

«Bul qasirettiń saıası sıpatynan áleýmettik-rýhanı saldary anaǵurlym joǵary turǵanyn únemi eskerýimiz kerek. Halqymyzdyń óz tarıhynda júrip ótken aýyr da, kúrdeli ári zardapty joldaryn jan-jaqty zerttep, odan durys qorytyndy jasap, taǵylym men ǵıbrat ala bilsek, munyń búgingi Táýelsizdigimizdiń qadir-qasıetin tereń túsinýimizge zor yqpal etetini sózsiz», - dep túıdi Murat Baqtııaruly.

Foto: parlam.kz