Asharshylyq qurbandaryn eske alyp, aza tutatyn kúndi belgilep, ol Ulttyq qaraly kún retinde jarııalanýy kerek- senator M. Baqtııaruly

Búgin QR Parlamenti Senatynyń jalpy otyrysynda depýtattyq saýal joldaǵan senator Murat Baqtııaruly osy máseleni kóterdi.

Saýal basynda qazaq halqynyń tarıhyndaǵy 1928-1933 jyldardaǵy asharshylyq týraly oıyn jetkize kele depýtat Murat Baqtııaruly osynaý zulmat týraly aşy shyndyqtyń aıtylar kezi kelgenin atap ótti. Onyń sózine qaraǵanda, asharshylyqtyń aýqymyn, zardaby men zalalyn áli de naqtylaı túsý qajet. «Buǵan deıingi atqarylǵan sharalarǵa qaramastan Qazaqstandaǵy asharshylyqtyń tarıhy men zardaby jaıynda álemdik qaýymdastyq az biledi. Olarda tolyqqandy maǵlumat ta joq. Sondyqtan da, elimizde jaryq kórgen asharshylyqqa qatysty eńbekterdi aǵylshyn tiline aýdarý qajet», - dedi senator.

Budan bólek, Murat Baqtııaruly qazirgi tańda jyl saıyn 31 mamyr saıası qýǵyn-súrgin qurbandaryn eske alý kúni retinde atalyp júrgenine toqtalyp, bunyń asharshylyqqa sonshalyqty qatysty emes ekendigin de alǵa tartty. Onyń aıtýynsha, saıası qýǵyn men asharshylyq náýbeti - eki bólek uǵym. «Sondyqtan da táýelsiz elimizdiń búgingi urpaqtary qoldan jasalǵan asharshylyqtyń qurbany bolǵan mıllıondaǵan otandastarynyń joqtaýshysy bolsyn, tarıhtan sabaq alsyn desek, sol asharshylyq qurbandaryn eske alyp, aza tutatyn jyldyń bir kúni belgilenip, ol Ulttyq qaraly kún dep jarııalanýy kerek», - dedi M. Baqtııaruly. Depýtat sondaı-aq barlyq oblys ortalyqtarynda asharshylyq qurbandaryna arnalǵan eskertkish ornatylýy tıistigin de aıtty. «Zulmat týraly ashyq aıtylyp, oǵan ádil saıası-quqyqtyq baǵa berilgeni abzal. Tarıhymyzdyń eń bir qasiretti jaıy búgingi óskeleńniń sanasyna tolyq jetýi shart. Biz buny totalıtarlyq júıeniń qoldan uıymdastyrǵan ashtyq qurbandaryna aınalǵan jazyqsyz jandardyń rýhy aldyndaǵy ózimizdiń árdaıymǵy azamattyq paryzymyz dep sezinýge tıispiz», - dedi ol.