Asharshylyq qazaq tarıhyndaǵy eń qasiretti oqıǵa boldy - Memlekettik hatshy
ASTANA. 1 maýsym. QazAqparat - Asharshylyq qazaq tarıhyndaǵy eń qasiretti oqıǵa boldy. Bul týraly búgin elordada ótip jatqan «Qazaqstandaǵy asharshylyq: halyq tragedııasy jáne tarıh sabaqtary» halyqaralyq ǵylymı-tájirıbelik konferentsııa barysynda QR Memlekettik hatshysy Muhtar Qul-Muhammed aıtty.
«Biz búgin tuńǵysh ret Qazaqstan tarıhyndaǵy eń qasiretti kezeń, asharshylyq tragedııasyna arnalǵan halyqaralyq konferentsııaǵa jınalyp otyrmyz. Eýrazııadaı alyp qurlyqtyń júreginde ornalasqan, óz aýmaǵyna 5 Frantsııa erkin sııatyn Qazaqstannyń arǵy-bergi tarıhynda jan berisip, jan alysqan urystar men almaǵaıyp oqıǵalar az bolǵan emes. Biraq solardyń birde-birinde qazaq halqy asharshylyq jyldary oryn alǵandaı asa zor adam shyǵynyna ushyraǵan joq. Sondyqtan asharshylyq qazaq tarıhyndaǵy eń qasiretti oqıǵa boldy», - dedi.
Onyń paıymynsha, kommýnıstik ıdeologııa ústemdik etken keshegi Keńes odaǵy sııaqty totalıtarlyq memlekette asharshylyq taqyryby múldem zerttelmedi. Aqıqatyn aıtqanda ony zertteýge tyıym salyndy.
«Sondyqtan asharshylyq týraly shyndyq keshegi Keńes odaǵy tarıhynda aqtańdaqtar aqıqattary tam-tumdap ashyla bastaǵan ótken ǵasyrdyń 80-shy jyldardyń sońynda ǵana aıtyla bastady», - dep erekshe toqtalǵan Memlekettik hatshy qazaq halqynyń basynan ótken sol bir qıyn-qıystaý kezeńdi jaryqqa shyǵarýda zor eńbek sińirgen ǵalymdardyń esimderin zor iltıpatpen atap ótti.
