«Asharshylyq» fılminde sol kezdegi saıası elıta kórsetiledi
ALMATY. QazAqparat - «MG production» kıno kompanııasynyń bas prordıýseri Ernar Málikov fılmde sol kezdegi Qazaqstannyń saıası elıtasy bar bolmysymen kórsetiletinin aıtty, dep habarlaıdy QazAqparat tilshisi.
«Asharshylyq fılminde sol kezdegi saıası elıta kórsetiledi. Onda shaǵyn bir otbasynyń oqıǵasynan bastap, búkil Qazaqstandaǵy ahýaldy kórsetemiz. Goloşekın bastaǵan sol kezdegi Qazaqstan basshylyǵy tolyǵymen kadrda bolady. Tarıhty búkpesiz kórsetemiz. Onyń ishinde Reseıden jer aýdarylyp kelgen orys áıeliniń balalar úıi úshin Goloşekınnen qarajat suraǵany týraly, Turar esimdi qazaqtyń búrkitimen aýylyn asyraǵany týraly epızodtar bar», - dedi«MG production» kıno kompanııasynyń bas prordıýseri Ernar Málikov.
Ernar Málikov fılm qazaq tilinde, qazaq akterleri oınaıtynyn aıtty.
«Fılm Taldyqorǵan, Almaty, Óskemenniń mańaıynda túsirilýi múmkin. Daıyndyq júrip jatyr. Qazaq tilinde, qazaq akterler rólderdi somdaıdy», - dedi Ernar Málikov.
Aıta keteıik, búgin Almaty qalasynda «MG production» kınokompanııasy «Start taım» kraýdfandıng platformasymen birlese otyryp «Asharshylyq» tarıhı dramasyn túsirý jumystaryn bastalǵanyn habarlady. Fılm 1931-1933 jyldar aralyǵynda qazaq halqynyń basynan ótken asharshylyq taqyrybyna arnalmaq.
