Asharshylyq jyldary balyq tıelgen tarıhı 14 vagonnyń biri Aral mýzeıinde tur
QYZYLORDA. KAZINFORM — Qıyn-qystaý zamanda Edil boıy men oǵan jaqyn aýmaqtaǵy ashtyq qysqan jurtqa kómek retinde Araldan 14 vagon jóneltilgeni tarıhtan belgili. Sol vagondardyń biri búginde Aral aýdanyndaǵy Balyqshylar mýzeıiniń aýlasynda tur.
Aral balyqshylary RKFSR Halyq komıssarlary keńesiniń tóraǵasy Vladımır Lenınniń 1921 jylǵy 7 qazanda jazǵan haty boıynsha asharshylyqqa ushyraǵan Povolje turǵyndaryna, onyń ishinde 7 mıllıonnan astam balaǵa kómek qolyn sozǵan.
— Aýdandaǵy Qarashalań, Qaratereń, Amanótkel, Bógen, Qambash, Aralqum aýylynyń balyqshylary tonnalaǵan balyqty 3-4 kúnde vagondarǵa tıep, Qambash stantsııasynan Povolje halqyna jibergen. Sazan, jaıyn, tortasy bar, aýǵa ne túsedi, sonyń birin qaldyrmaı jınaı bergen. Áıel, bala demeı adamdardyń bárin jaýapty jumysqa jekken. Qaqap turǵan qysta ton kıip alyp, shanany jylqyǵa, ol bolmasa sıyrǵa artyp, shyǵyrmen balyq aýlaýǵa shyqqan. Qambash stantsııasyna baryp, vagondardy toltyryp, ónimdi Povoljege jóneltken, — dedi mýzeı meńgerýshisi Álisher Sarjanov.
Aty ańyzǵa aınalǵan 14 vagonnyń biri 2021 jyly Balyqshylar alleıasy ashylǵan kezde Aralǵa ákelindi. Ol qala turǵyndary men týrısterge tarıhtyń tereńine boılaýǵa múmkindik beretin qundy jádigerge aınaldy. Mýzeı aýlasynda odan bólek ótken ǵasyrda balyq sharýashylyǵynda paıdalanylǵan Aralrybprom, T.Tohtarov, T.Álimbetov katerleri men Lev Berg zertteý kemesin, balyqshylar tutynǵan qural-jabdyqtardy tamashalaýǵa bolady.
Buǵan deıin biz Araldyń aıbyny asqaqtap turǵanda aıdynynda júzgen kemelerdiń qazir qaıda ketkenin zerttep kórgenbiz.