Ashanada ýlanǵan atyraýlyq jumysshylardyń ómirine qaýip joq - Densaýlyq mınıstrligi

ASTANA. QazAqparat -Ashanada ýlanyp qalǵan atyraýlyq jumysshylardyń densaýlyq jaǵdaıy turaqty dep baǵalanýda. Bul týraly  QazAqparatqa Densaýlyq saqtaý mınıstrliginiń baspasóz qyzmetinen málim etti.

«Atyraý qalasynda «Qarabotan» JShS-nyń jumys ashanasynda ýlanǵan 9 jumysshynyń jaǵdaıy turaqty dep baǵalanady, olardyń ómirine esh qaýip joq. Qazirgi kezde oryn alǵan jaǵdaıdyń sebepteri anyqtalýda», - dep habarlady mınıstrlikten.

2 qyrkúıekte Atyraý qalasynyń qalalyq juqpaly aýrýlar aýrýhanasyna «Jiti ishek ınfektsııasy» dıagnozymen atalǵan JShS-nyń 18 jumysshysy júgingeni belgili boldy, onyń ishinde 10 adam «Aýyrlyǵy ortasha dárejedegi jiti ishek ınfektsııasy» aldyn ala dıagnozymen aýrýhanaǵa jatqyzyldy.

Ashananyń qyzmeti toqtatyldy, onda tamaqtanǵan barlyq jumysshylar profılaktıkalyq emdeýden ótti.

«Oqıǵa sebepterin tergep-tekserý maqsatynda ónimderdiń synamalary, syrtqy orta obektilerinen shaıyndylar zerthanalyq zertteýge alyndy, sondaı-aq as blogynyń  qyzmetkerleri patogendi floraǵa zertteldi.

Zerthanalyq zertteý nátıjeleri boıynsha salmonella enterıtıdıs qozdyrǵyshy anyqtaldy. Aldyn ala derekter boıynsha aýrýdyń juǵý kózi ashananyń qyzmetkeri bolýy múmkin. Óıtkeni as blogynyń bir qyzmetkerinen salmonella enterıtıdıs qozdyrǵyshy tabyldy. 

Oshaqta epıdemııaǵa qarsy is-sharalar jalǵasýda», - delingen habarlamada.