Ash-Sharaa Sırııa jańa úkimetiniń quramyn jarııalady
ASTANA. KAZINFORM — Sırııanyń ýaqytsha prezıdenti Ahmed ash-Sharaa eldegi jańa úkimettiń quramyn tanystyrdy. Bul týraly 29 naýryzda SANA agenttigi habarlady.
Ash-Sharaanyń jaqtastary Mınıstrler kabınetindegi kópshilik orynǵa ıe boldy. Ash-Shara jańa úkimetti «qurý jáne ózgertý úkimeti» dep atady.
Mınıstrler arasynda bir áıel bar. Hrıstıan azshylyǵynyń ókili jáne Bashar Asad rejımine uzaq ýaqyt qarsylas bolǵan Hınd Kabavat Sırııanyń Áleýmettik ister jáne eńbek mınıstri bolyp taǵaıyndaldy.
Ash-Sharaa el tizginin qolǵa alǵan kezde saılanǵan Syrtqy ister mınıstrligi men Qorǵanys mınıstrliginiń basshylary óz qyzmetterin saqtap qaldy.
Sırııanyń ýaqytsha basshysy úkimettiń negizgi basymdyqtary Sırııany «qalpyna keltirý» jáne «ult pen árbir azamattyń múddelerine kepildik beretin kúshti jáne turaqty memleket» qurý, sondaı-aq sybaılas jemqorlyqpen kúresý, armııany damytý jáne ekonomıkany nyǵaıtý bolady dep basa aıtty.
Aıta keteıik, buǵan deıin Sırııa prezıdenti jańa úkimettiń quramyn 29 naýryzda jarııalaıtynyn jazǵan edik.
Sırııa 5 jylǵa ýaqytsha konstıtýtsııaǵa qol qoıdy.
Sırııanyń jańa bıligi kúrdtermen kelisimge qol qoıdy. Kelisim Sırııanyń soltústik-shyǵysyndaǵy kúrd avtonomııalyq ákimshiliginiń azamattyq jáne áskerı ınstıtýttaryn Sırııanyń jańa úkimetine biriktirýdi kózdeıdi.