Asfendııarov atyndaǵy QazUMÝ sport dárigerleri men bıoınformatıkterdi daıarlaıdy
Bul týraly ýnıversıtet rektory Talǵat Nurǵojın Almatyda ótken eseptik kezdesýinde málimdedi, dep habarlaıdy QazAqparat.
Mamandardy oqytý magıstratýra dárejesinen bastalady. Sporttyq osteopat-dárigerlerdi Qazaq týrızm jáne sport akademııasymen birlesip ázirleıdi. Al Halyqaralyq aqparattyq tehnologııalar ýnıversıtetimen birge - bıologııalyq aqparatty matematıkalyq taldaýmen aınalysatyn, genetıkalyq mýtatsııalardy boljaýǵa arnalǵan baǵdarlamalar ázirleıtin bıotehnologtar daıarlanady.
Sondaı-aq, farmatsevtıkalyq kosmetologııa boıynsha magıstratýra ashylady - onda sarapshylar kosmetıkalyq medıtsına úshin dárilik zattardy taǵaıyndaýda kómek kórsetedi.
«Biz óz múmkindikterimizdi keńeıtýimiz qajet. Jumys istep, qarajat taba alatyn suranystaǵy mamandardy daıarlaıtyn bolamyz. Máselen, epıdemıologtar men bıostatıstıkter qazir joq», - dedi QazUMÝ rektory.